中环一向系异国风情汇聚地，最近呢间全新餐厅“PASTEAKO”都成为中环美食一员，主打手工意粉同牛扒，而店名“PASTEAKO”正正结合佢哋嘅招牌菜—Pasta同Steak。呢度嘅手工意粉有香港罕见口味，更可自由配搭意粉款同酱汁。晚餐时段每30分钟，仲会人手摇钟免费添意粉，用餐感觉好特别。
餐馆装潢宛如黑手党电影《教父》氛围，墙身挂满年代感黑白相，加埋复古红白地砖、酒红皮感梳化、昏黄灯光好好feel～一坐低仲有一系列锯扒刀畀你拣，浸沉式扒房体验，好似瞬间穿梭到50年代嘅西方国度咁啊。
【$188三道菜午市套餐】自由配搭意粉+酱汁+肉食
中环竟然可以$200内叹到三道菜lunch set？冇错！呢度嘅午市套餐只要$188就食到意粉、肉食同埋甜品，性价比激高!! 手工意粉专门店“PASTEAKO”对意粉出品好高要求，供应多达10款意粉种类，所有款式由面团到塑型都系全人手新鲜制作，口感同味道都系独一无二㗎！
意粉组合不败推荐～
客人可以喺5款意粉款式中自选心水形状，分别有螺丝粉(Fussili)、马铃薯面团(Gnocchi)、有机长通粉(Organic Penne)、扁意粉(Linguini)同埋粗管面(Rigatoni)。款款意粉都烟烟韧韧，想挂汁又得；方便大大啖食都无问题㗎。
除咗意粉，酱汁一样可以自由配搭，有经典番茄酱(Promodoro)、蒜味橄榄油(Aglio E Olio)、青酱(Pesto)、蘑菇酱(Funghi)、香辣番茄酱(Spicy Arrabbiata)，变化丰富。
青酱 x 螺丝粉(Pesto Fussili)
义大利螺丝粉嘅旋转扭纹可以挂满酱汁，钟意多酱嘅话必试啊。而青酱加咗蒜香、松子同埋罗勒叶，味道清新仲带少少青草气息𠻹～
蒜味橄榄 x 有机长通粉(Aglio E Olio Organic Penne)
如果钟意食意粉嘅原始麦香，可以拣蒜味橄榄油口味。以淡淡蒜香配合健康橄榄油，整体唔会太腻。
番茄酱 x 粗管面(Promodoro Rigatoni)
意粉配番茄酱可以话系万年不败嘅组合，粗管面更可以兜住多啲酱汁，拣酸酸甜甜嘅番茄酱真系好perfect！
香辣番茄酱 x 扁意粉(Spicy Arrabbiata Linguini)
身边总有啲朋友系无辣不欢，呢度一样有辣味拣㗎。经典酱汁一般系由果肉饱满嘅圣马札诺番茄、香蒜、红辣椒干制成，“PASTEAKO”更加咗少少花椒带出椒麻刺激感。每一条扁意粉嘅表面都挂满香辣酸甜酱汁，超级惹味!!!
蘑菇酱 x 马铃薯面团(Funghi Gnocchi)
土豆做嘅圆碌碌面团，由煮熟并压碎嘅土豆混合面粉、鸡蛋等制成，口感同其他意粉好唔同。黏稠柔软又好有咬口，食完好有满腹感。
睇埋午市肉类 & 甜品～
午市套餐嘅肉类2选1，分别有牛扒同鸡胸。牛扒系前腰脊肉位，肉质紧致兼牛味浓郁；鸡胸就香烤过几惹味，而且鸡肉软嫩唔会太干。最后食埋甜品Lemon Panna Cotta，绝对系超级满足嘅组合啊～
【$388晚市套餐】每30分钟人手摇钟免费加意粉
“PASTEAKO”晚市套餐都好抵食，同样可以自由配搭意粉款式+酱汁，仲有埋21日干式熟成牛扒食。留意返，有啲独特意粉口味系晚市先有，好值得夜晚嚟㗎。
最特别系晚市限定人手摇钟环节!! 每30分钟员工就会响钟，提示免费加意粉时间又到喇～真系好有欧洲classic小酒馆气氛，就算食饱唔使再添食都好期待响钟嗰刻啊。
晚市独特意粉口味～
晚餐时段供应嘅5款意粉—宽蛋面(Parpadelle)、义大利粉(Spaghetti)、贝壳粉(Conchiglie)、短管面(Mezzi Rigatoni)、蜗牛粉(Lumache)。
另有6款酱汁自行组合—松露酱(Truffle)、四款乾酪酱(Quattro formaggi)、罗曼斯可酱(Romesco)、鳀鱼番茄酱(Puttanesca)、番茄酱(Promodoro)、香辣番茄酱(Spicy Arrabbiata)。
人气组口推介～
鳀鱼番茄酱 x 义大利粉(Puttanesca Spaghetti)
成日食嘅细圆义大利面条最百搭，同各款酱料都好夹。私心推荐晚市限定鳀鱼番茄酱，以番茄、橄榄、鳀鱼、酸豆同蒜煮制，系义大利经典之一!! 入口酸甜带微辛口，味道几特别。
松露酱 x 贝壳粉(Truffle Conchiglie)
贝壳状好啱填馅挂酱，适合配搭浓厚松露酱。好似将松露香气浓缩喺贝壳粉入面咁，做到齿颊留香效果。
四款乾酪酱蜗牛粉(Quattro formaggi Lumache)
坊间好少食到蜗牛粉，其实呢款呈螺旋形嘅短面条，因卖相酷似蜗牛壳而得名。旋蜗形状好啱配浓稠酱汁，呢款混合四款乾酪嘅酱汁超咸香，乾酪迷一定钟意！
【21日干式熟成牛扒】牛扒界天花板
另一焦点就系Dry-Aged牛扒喇！呢度供应肉眼同牛肉前腰脊部位，牛肉经过21日干式熟成后，天然酵素会自行分解牛肉蛋白质、脂肪、碳水化合物，牛味同油花都更浓郁丰腴㗎。
PASTEAKO
地址: 中环鸭巴甸街35号元创方B座Hollywood地下HG01-HG05号舖
Facebook: https://rb.gy/v5gn44
Instagram: @pasteako