想喺尖沙咀望靓景食Lunch! 呢间泰越酒吧餐厅“MAMTOM”嘅午市套餐只系$80，就可以一边欣赏维港美景、一边享用高质泰越菜啦。
午市套餐$80可自选前菜、主菜；并可优惠价+$18追加甜品，每日12pm-3:30pm都有㗎!!
【前菜】
前菜6选1都几丰富，钟意香口啲可以拣春捲、香辣鸡翼，下昼配杯啤酒都几chill啊。清爽简单啲又有青木瓜沙律，或者红咖喱配薄饼都好开胃啊。
【主菜】
主菜5选1，想食饭嘅有鸡肉碎咖喱炒饭配蛋、鸡肉/牛肉炒饭等；仲有款红咖喱茉莉香米/米粉(配鸡/蔬菜)，素食者都啱食。
最私心推荐系炸青木瓜及豆腐 配茉莉香米/米粉，平时好少食到炸青木瓜，外酥内软几清新脆口，有种食紧日本蔬菜天妇罗咁，好吸引!!
【Lunch Set配搭】
我哋今次就食咗3个Lunch Set，前菜+主菜其实都好大份，加埋甜品坐个下昼几爽，畀大家参考吓～
春捲+红咖喱茉莉香米/米粉(配鸡/蔬菜)+椰子Gelato
春捲炸到好金黄香脆，而且好爆馅有鸡肉碎、越南香草、生菜等等，口感好丰富。好钟意佢个汁，酸甜辣几有层次。
红咖喱就唔会好辣，系辣中带甜嗰种，最后食个椰子冰淇淋啱啱好。
香辣鸡翼+鸡肉/牛肉炒饭+炸香蕉
鸡翼用咗泰国辣椒、香茅、大蒜醃制，咸辣冲撃!! 浓味控一定钟意啊～同埋鸡皮炸到好厚脆，存在感强真系脆卜卜咁。
炒饭正常发挥，粒粒分明几干身，谂唔到食咩拣个炒饭几开胃。反而炸香蕉几有惊喜，真系炸到金黄好脆，出面又有啲炼奶好香甜。
青木瓜沙律+鸡肉碎咖喱炒饭配蛋+炸香蕉
平时食泰国嘢都好钟意嗌木瓜沙律，比其他沙律爽脆酸甜，加埋啲虾干、花生、罗望子调料几惹味。咖喱炒饭最正系有只太阳蛋，捞埋蛋浆一齐食真系瞬间清碟。
升级优惠～
+$118升级冬阴功粉丝汤，独特酸辣风味。
+$138越南牛肉粉，汤底牛味浓郁；另+$58仲有滑嘟嘟嘅牛骨髓。
越南米粉料理Bun Thit Nuong，+$118(剁碎羊肉)/+$108(牛肉)/+$80(鸡肉)。捞匀鱼露一齐食好有风味。
MAMTOM
地址: 尖沙咀么地道62号永安广场地下1-6及45-46号舖
电话: 27213600