想喺旺角饮嘢、食饭直落，呢间天台酒吧餐厅“Reflect”就有梦幻鸡尾酒+墨西哥fusion菜啦。由多年墨西哥菜经验大厨主理，绝对唔系得墨西哥粟米片(Nachos)之流。
呢度有多款口味嘅墨西哥烤肉(Fajitas)、墨西哥夹饼(Tacos)、辣肉馅捲饼(Enchilada)等经典料理外，仲会每半年更新吓餐牌。最近秋冬新推咗好多炸物，好似炸墨西哥辣椒(Jalapeño Pepper)、配特制乾酪酱嘅墨西哥粟米薄饼(CornTortilla)等等。
“Reflect”有个靓靓室内环境之外；仲有望旺角夜景嘅户外空间，大到可以包场举办轻婚礼，劲开扬有feel啊。
所以大厨都预咗大家会食住饮成晚，除咗一系列多乾酪兼重酱嘅墨西哥料理外，仲加咗相对轻盈嘅白酒牛油汁青口、龙虾汁软壳蟹阔条面等fusion料理。一班人食吓饮吓，唔觉唔觉就一晚啦。
【全新墨西哥料理】
香炸墨西哥辣椒(Jalapeño Pepper)
墨西哥当地好受欢迎嘅小食，将新鲜Jalapeño酿入乾酪后，再蘸满面粉、蛋浆炸到金黄酥脆。大厨事前起走咗Jalapeño嘅辣椒籽，所以食落唔会好辣，反而系劲重拉丝乾酪味再渗出微酸微辣咁，好啱饮酒食啊。
墨西哥粟米片(Corn Tortilla)
Corn Tortilla系墨西哥嘅饮食文化基础，亦系当地人日常主食。粟米制脆片有种独特谷类香味，干身薄脆好啱配酱食。
今次大厨就用美国人钟意嘅高级乾酪，再加其他香料调味。相比一般车打乾酪更加浓郁，绝对系高质佐酒小食啊。
经典墨西哥馅饼
呢款超大份量嘅墨西哥馅饼，面粉制饼皮会软绵好多。相比脆卜卜嘅粟米制Corn Tortilla，又系另一种口感。馅饼好爆馅，加埋上面嘅莎莎酱、牛油果酱、酸奶油等等，绝对大满足。
【Fusion创作料理】
原只起骨烧春鸡
平时见到烧春鸡会担心食到好狼狈，呢度原只起晒骨嘅烧春鸡就唔使担心喇。春鸡用咗墨西哥Ajihoti香草砖、辣粉、孜然粉等醃制，肉味又香又辣。
春鸡仲会跟配墨西哥薄饼(Tortilla)，可以自己夹鸡肉食，即刻变身地道馅饼(Queso Pollo)，蘸埋秘制乾酪酱食仲正啊。
白酒牛油汁青口
平时多数系白酒煮青口，“Reflect”就加埋特调牛油汁落去。唔会遮盖咗青口独特嘅贝味，又会creamy啲香啲，系比较意式嘅fusion做法。
龙虾汁软壳蟹阔条面
嚟到墨西哥餐厅，一定会叫好多有乾酪嘅馅饼、脆片。大厨设计菜式时就考虑到呢点，所以加插咗高人气嘅软壳蟹阔条面，等你喺乾酪同乾酪之间解腻过渡吓。
目测软壳蟹偏大只，仲要系原只蟹上几正。而且意粉酱都几多几浓郁，真系每啖都好挂到汁，浓味控唔会失望。
【自家制甜品】
热情果乾酪饼
唔讲唔知，原来呢度仲有自家制甜品。好似呢款乾酪饼咁，蛋糕质地好绵滑，食得出同直接来货嘅质素几唔同。
REFLECT Restaurant & Bar
地址: 旺角西洋菜南街74-84号旺角城市中心12楼
电话: 94029697