鹅颈桥隔篱嘅港式火锅「十下火锅」，甫入店好似穿越返去香港80-90年代，以怀旧装饰、一枱一櫈打造大排档主题，同场大播90后熟悉嘅广东歌真系好有feel啊。最近火锅店引爆人气，甚至连最强星二代—木村光希、木村心美都嚟捧场！今次仲有靓妈工藤静香同行，一齐试吓地道港式风味。
呢度唔只卖情怀，汤底、配料都好讲究。全店6款汤底均无味精，每日于老汤底加新鲜猪骨熬4至5个钟，够晒入味浓郁，打边炉前一定要饮啖热汤暖吓胃先。
【零味精经典汤底】
火瞳花胶鱼肚鸡汤
香港人最经典嘅老火汤，不得不提花胶鸡汤!! 呢个味真系由细饮到大，大个咗用呢个熟悉味道打边炉又系另一番风味。
「十下火锅」以花胶鸡汤作基调，再加鸡骨、带骨金华火腿更富肉味咸香，同时略带药膳味。配料当然有女士养颜嘅花胶、鱼肚，饮第一啖汤已经发觉汤身好浓厚，系满满胶质感觉。
蟹肉瑶柱冬瓜汤
如果你打边炉钟意食海鲜，可以拣呢个蟹肉瑶柱冬瓜汤底，清清甜甜真系好夹海鲜!! 汤底用咗杞子、鲜蟹肉、干瑶柱、金华火腿熬煮，等到个汤滚起时，店员会帮手切开冬瓜，绵密冬瓜肉吸满精华，留到中后段食好正。
蟹肉瑶柱冬瓜汤Perfect Match | 海鲜拼盘
太多海鲜唔知点拣，可以直接嗌个海鲜拼盘，有扇贝、蛏子、鲍鱼、翡翠螺、鱿鱼、鲜蚬。全部即日买新鲜货，店家会依当日订座人数预货，保证日日新鲜，仲可以另加本地龙虾仔㗎。
【牛控必食】
呢度有牛味浓嘅本地牛；又有软嫩嘅安格斯牛，当然都有打边炉经典－美国肥牛啦。除咗有齐多款牛选择，最特别系店家创作嘅干辣椒鸡蛋手切牛肉，红卜卜登场几惊喜。
安格斯牛小排
牛小排油花分布平均、肉质鲜嫩，好啱打边炉。
干辣椒鸡蛋手切牛肉
「十下火锅」将肉味浓嘅本地手切牛肉洒满辣椒，食之前戳开蛋黄捞匀，滚一滚就食得。外层嘅蛋浆特别嫩，牛肉又辣辣哋几过瘾。
【童年回忆】
「十下火锅」唔止环境有回忆杀，连嘢食都勾起好多回忆啊。
咸蛋捞饭
细细个一定食过嘅咸蛋捞饭，呢度都系人手将咸蛋拆肉捞落炒饭，估唔到嚟打边炉都食得返个味。听讲好多熟客都钟意嗌呢个捞饭，一边打边炉、一边食啖饭几过瘾。
如果钟意咸蛋捞饭咁一碗碗上，即刻食得唔使等，仲有滑嫩嘅麻辣鸭血㗎。
老少平安
细个打边炉无而家咁丰富，长辈都钟意落啲豆腐、鲮鱼肉。呢度就将呢两样食材加埋一齐，食落有鲮鱼肉嘅弹牙口感，后续又啲豆味。
酱爆濑尿牛丸
正所谓「争咩吖，两样沟埋做濑尿牛丸吖笨」，今次真系将濑尿虾沟埋牛丸，咬开入面系爆汁登场嘅濑尿虾肉，终于食到经典电影场景嘅真实味道啦。
【高质自家制】
十下三宝滑
呢度有几款创作手打滑，选择困难why no both? 可以直接嗌十下三宝滑，有齐发菜蠔豉牛筋滑、咸蛋黄墨鱼滑、虾籽虾干鲜虾滑。估唔到细个成日食嘅发菜蠔豉，打入牛筋滑又几夹，仲食到发菜口感几正。
而咸蛋黄墨鱼滑就霸气十足，咸蛋黄味存在感强，咸咸香香+弹牙口感几正。虾籽虾干鲜虾滑就将几种虾食材打至起胶，虾味十足是常识吧。
蟹肉蟹粉饺
另一人气自家制有蟹肉蟹粉饺，蟹味double浓郁。每日人手包制，够晒爆馅鲜味。
【饮饱食醉】
打边炉点少得饮酒，除咗有啤酒、红白酒拣，仲有近年爆红嘅香港制原浆啤酒。天然成分以传统方法发酵28日，做出独特口感之馀，又保留天然酵母嘅酵厚麦味同清爽口感。
十下火锅
地址: 铜锣湾登龙街28号永光中心2楼
电话: 35204111
