原来香港都有肚皮舞睇!! 呢间黎巴嫩人开嘅“Shahrazad Lebanese”，将当地人热情带嚟香港，逢星期四8:30pm邀请肚皮舞孃即席表演。一边食黎巴嫩菜、一边睇表演，舞孃仲有机会行到你身边跳舞。估唔到香港都有呢种体验，好似去咗趟中东旅行咁呀。
“Shahrazad Lebanese”俨如阿拉丁世界，店内宝蓝色墙壁、镂空雕花窗饰都好唯美。梳化位仲放满图案咕𠱸坐得好Chill，好多女仔都钟意揽住嚟影相。另一个人气打卡位系半户外座位，望住红砖古蹟「大馆」饮酒，同平时熙来攘往嘅香港夜景完全两种感觉。
【黎巴嫩菜有咩食?】
其实黎巴嫩菜好健康，主要以豆类、蔬菜、水果煮制海鲜肉类，将调味料减至最低，亦系近年受推崇嘅「地中海饮食」之一。“Shahrazad Lebanese”外籍主厨更坚持只用外国高质食材，所以就算望落简单嘅豆蓉、烤茄子、烤肉都用咗多种天然香料调味，食落好有层次惊喜。
黎巴嫩人饭前会食啲前菜—Cold Mezze、Hot Mezze，无论冷盘热盘都有好多选择㗎。
Cold Mezze
鹰嘴豆蓉(Hummus Awarrma)
好经典嘅鹰嘴豆蓉，连埋煎羊肉、松子一齐食，多重口感又开胃。
Hot Mezze
Kibbeh
黎巴嫩特色美食Kibbeh，混合羊肉碎、小麦碎、煎羊肉、鹰嘴豆蓉炸到外脆内软。食嗰阵蘸啲红菜头酱一齐食，香口健康。
炸鹰嘴豆饼(Falafel)
外国好兴嘅健康小食—炸鹰嘴豆饼。第一啖咬落去有啲硬脆，入面就系绵密嘅鹰嘴豆蓉，配埋奶酪酱更加好食。
(左)Kibbeh、(右)炸鹰嘴豆饼(Falafel)
烤哈罗米乾酪(Grilled halloumi)
哈罗米乾酪特点系唔易融化，所以大厨可以将表面烤至金黄，外层微焦轻韧；内里柔软咸香，同平时食嘅乾酪好唔同呀。侧边嘅西瓜沙律、石榴酱轻甜清爽，同乾酪一咸一甜啱啱好。
香煎虾(Shrimp Matffie)
无论中东、欧洲地区都经常用大虾做前菜，最重要系橄榄油吸满蒜蓉、大虾精华超咸香。如果谂住同朋友嚟“Shahrazad Lebanese”饮吓酒、食吓嘢，嗌呢款香煎虾就啱喇。
自家制香料羊肉香肠(Lebanese Makanek)
平时都系食鸡肉肠、猪肉肠多，估唔到羊肉香肠又几好食。羊肉味会浓啲又唔羶，而且羊肉够多好绵密。
香烤澳洲茄子(Roasted Eggplant)
中东料理常见嘅烤茄子。茄子皮脆脆地，茄子肉又好柔软。跟配椰枣糖蜜、奶酪酱几有新鲜感，比平时食开嘅蒜蓉茄子有惊喜。
香辣土豆(Batata Harra)
简单嘅炸土豆永远有种食完又想食嘅魔力，外层洒满烤孜然、大蒜，饮啤酒一流。
(左)香烤澳洲茄子(Roasted Eggplant)、(右)香辣土豆(Batata Harra)
中东乾酪馅饼(Sambousek Cheese)
酥皮馅饼炸到几松脆，入面系满满咸乾酪、香草，一咬开仲有少少拉丝口感，乾酪控一定好钟意!!
Main
慢煮炖羊肩(Tagine Bamia Bil Lahm)
其实Tagine系陶瓷锅一种，慢煮期间可全面保存食材水份。所以羊肩会Keep到好嫩滑，用叉轻轻撕开已经得。番茄酱汁略带肉味，用嚟捞饭一流。
慢煮羊膝(Freeket Mozzah)
同样系慢煮到好腍嘅羊肉料理。如果你钟意浓郁啲，又多啲油脂滑啲，更推荐呢款慢煮羊膝。特配嘅希腊奶酪酱，食多几啖肉都唔会腻。
慢煮美国顶级牛肋骨(Lahma Bil Fasolia)
始终无牛不欢嘅话，呢道慢煮牛肉系用USDA Prime级别嘅牛肋骨。牛肉煮到入晒味，近乎肉骨分离劲软腍。
To Share
烤肉拼盘(Shahrazad Mix Grill Meat)
黎巴嫩人好钟意食烤肉，“Shahrazad Lebanese”更系香港少见真·炭烧。拼盘堆满烤牛肉、羊肉、鸡肉，全部烧到有炭香肉汁。今次呢个Size只系2人小份量，多人嚟食嗌个大嘅真系好满足。
Shahrazad Lebanese Dining Lounge & Bar
地址: 中环云咸街75-77号嘉兆商业大厦2楼
电话: 23300242