召唤各位马拉菜迷!! 最近新开嘅“makan makan”主打东南亚料理，全因外籍大厨团队受马来西亚之旅启发，将当地热闹街头美食文化搬到嚟香港!!
呢度唔系普通嘅马拉菜，而系融合马来西亚香料、泰国清新风味、越南草本气息嘅新派菜式，重新演绎经典嘅椰浆饭、炒粿条、槟城虾面、怡保鸡肉河粉、马来西亚咖喱等等，层次丰富有惊喜啊。
外籍大厨团队受马来西亚之旅启发，将当地热闹街头美食文化搬到嚟香港。
马来西亚街头美食，再融入泰国及越南风味，撞出惊喜！
唔止食物吸引，“makan makan”环境装潢都好有想像力!! 佢哋从经典游戏《食鬼》汲取灵感，店内嘅鲜明色彩、复古图案、古怪细节、霓虹灯都系向怀旧嘅调皮玩味致敬，好有欢乐气氛。无论你想揾好嘢食，抑或想有个地方同朋友chill吓，“makan makan”都满足到啊。
装潢从经典游戏《食鬼》汲取灵感。店内鲜明色彩、古怪细节均向怀旧嘅调皮玩味致敬，好有欢乐气氛。
无论你想揾好嘢食，抑或想有个地方同朋友chill吓，“makan makan”都满足到啊。
一眼睇晒“makan makan”有咩食～
大虾柚子沙律 $68
结合各种口感食材—新鲜柚子、大虾、烤椰丝、炸干葱，加埋独特甜棕糖汁好有风味。
青木瓜丝沙律 $78
新鲜青木瓜丝搭配脆口嘅豆角、虾米，并以辣椒、罗望子汁撞出酸酸辣辣。
越式羊肉碎沙律 $78
泰国辣椒、洋葱丝同综合香料嘅香辛味，令羊肉碎嘅肉香更突出。
小金杯 $88
必食嘅传统马来料理，「金杯」装满炒萝卜、虾干、花生等等，拎住嚟食几有仪式感。味道好惹味，最钟意系连个「金杯」都食得。
甘香啦啦(蚬) $168
大大碟嘅炒蚬!! 用咖喱叶、大蒜、洋葱、虾干炒到香喷喷。而且每只蚬都有饱满蚬肉，辣辣哋又有海水味。
马来西亚沙嗲: 牛肉 $118／鸡肉 $108／羊肉 $118
马来西亚好经典嘅街头美食，沙嗲好浓花生酱味，基本上同3款肉都好夹啊。仲有菠萝、青瓜、洋葱等伴碟，食两啖串烧又解吓腻几正。
仁当牛肉饭 $108
除咗一系列马拉菜，嚟到“makan makan”都可以试吓其他东南亚美食。好似呢道印尼传统料理—仁当牛肉饭，用椰奶、香料将牛肉炖煮到软嫩入味，食落轻甜带辣，佐饭一流呀。
椰浆饭 $88 (配大虾／仁当牛肉／咖喱鸡)
相信大家对马来西亚经典嘅椰浆饭，一啲都唔陌生。椰浆饭香甜又烟韧，而3款配料选择都偏浓味，捞埋脆卜卜嘅花生、江鱼仔一齐食，真系瞬间清碟。
海南鸡饭 $98
东南亚美食点少得海南鸡饭！呢度用本地养殖三黄鸡，鸡肉软嫩又重鸡味。
烧原只谷饲黄鸡 $168
原只上嘅谷饲黄鸡，直接用手拎嚟食好爽快！外层烧到好有炭香，一撕开就爆出肉汁，独食或者share都过瘾。
烧原条黄花鱼 $148
黄花鱼鱼肉好细腻，淡雅又带鲜甜，直接烧嚟食仲多咗层酥脆感，海鲜迷一定要试。
和牛越南汤粉 $148
用越南河内风格熬煮嘅牛骨汤底，牛味浓郁醇厚。一开始饮啖热汤先，滑顺汤身配和牛同滑嘟嘟嘅河粉，香浓之馀唔会腻。
槟城虾面 $128
极富马来西亚特色嘅槟城虾面，配料丰富有鲜虾、通菜、鱼饼等。而用虾壳熬制嘅汤头，鲜甜浓郁，配挂汁嘅油面好有饱腹感!!
芒果糯米饭
最后可以食埋甜品，好似呢道芒果糯米饭就够晒大份，几个人share都得。同场亦有其他甜品，如黑芝麻汤圆、甘蔗甜薑糖水等。
东南亚街头食品指南｜午市菜单
东南亚街头食品指南｜晚市菜单
makan makan
地址: 将军澳澳南海岸唐俊街23号MONTEREY Place 地下G01号舖
电话: 90735833