“Mamaday”嘅玩味装潢、创意料理一向出名，最近仲涉猎埋音乐界𠻹!! 铜锣湾分店“Wish You A Mamaday”同音乐社交平台“VSing”合作，全新舞台装潢好有feel。只要嚟食嘢并下载“VSing” Apps，任何人都可以喺高级配置舞台点歌献唱。观众仲可以即场畀分，高达指定分数即有真·烟花、喷烟效果，好似开紧演唱会咁澎拜呀!! 呢度仲会不时举行歌唱比赛，记住留意“Wish You A Mamaday”最新动向，约埋好歌之人一齐嚟食嘢睇show。
全新menu以一系列嘅玩味fusion菜为主打，包括刺身级嘅焗法国生蠔、蓝莓奶油乾酪Pizza、海鲜豪华拼盘、炸日本河虾等。全用高质食材，又大玩新颖配搭，就算望落简单嘅牛扒都好有惊喜!!
【唔干嘅干式熟成】英国熟成28天西冷牛扒
新店继续引入牛扒界天花板—干式熟成牛扒Dry-aged Beef。顶级西冷会静置喺恒温0至3°C同85%湿度嘅熟成柜中，并于紫外线杀菌器下经28日干式处理。牛肉天然酵素会自行分解牛肉蛋白质、脂肪同埋碳水化合物，锁住牛肉水分令肉质更嫩滑、牛味特浓，油花仲特别丰腴㗎。
干式熟成牛扒Dry-aged Beef绝对唔干，肉味特浓又软嫩。
麻麻哋 三小点 ($88)
唔好畀个名呃咗啊～呢3款前菜小点一啲都唔麻麻哋(笑)。小食包括经3小时慢煮嘅柠檬柚子矶煮鲍鱼、鲜甜日本料理青柠蜂蜜带子刺身同咸香明太子松叶蟹肉多士。一道菜食匀多款高质海产好满足！
法国鹌鹑避风塘香辣炒饭 ($178)
大厨选用坊间罕见嘅法国鹌鹑髀!! 以港式惹味避风塘煮法爆香炒制，配上香辣炒饭，火辣辣刺激味蕾，中西合壁好正啊。鹌鹑髀肉质嫩滑，炒至外脆内滑几过瘾！
美国Prime牛小排pizza ($208)
咩话？！呢度竟然将牛小排加入pizza上面？无错，香脆薄批pizza铺满邪恶咸香嘅拉丝乾酪，加埋炙烤美国Prime牛小排，牛香突出而且油脂感十足，估唔到同pizza又几夹㖞！
法式香橙帝王蟹肉意粉 ($198)
法国嘅橙酒班戟就听得多喇，橙酒意粉大家又试过未呢？餐厅特意用咗法式甜品嘅做法烹煮，意粉淋上火焰浓烈橙酒，配埋鲜甜帝王蟹肉一齐食，酸酸甜甜同时带微微苦涩馀韵，想中和一下可以食埋香甜橙肉㗎～
摆乌龙...Lychee茶 ($48)
除咗食物餐牌外，呢度嘅特饮同鸡尾酒都好特别！好似呢杯摆乌龙...Lychee茶就用乌龙茶作基底，加埋荔枝糖水同肉桂条添上香气。清幽茶香会透出荔枝甜味，层次好丰富。
醉酒贵妃Vodka ($98)
想同朋友小酌几杯嘅话，可以一试呢款Cocktail，味道甜甜哋好易入口，同时仲带荔枝果香。唔算好呛喉，几啱女仔饮啊～
Tequila Sunrise ($88)
呢款由餐厅自己重新调配创作，龙舌兰酒内加入秘制橙汁，饮落有多重层次，而且甜味更突出。
Wish You A Mamaday
地址: 铜锣湾骆克道491-499号京都商业中心10楼
电话: 39967380
营业时间:下午6时至凌晨2时