好多人话香港咩都有得食，你又试过晒咁多菜系未先? 中环就有间黎巴嫩菜“Shahrazad Lebanese”，系真·黎巴嫩人开!! 环境仲布置到好似阿拉丁宫殿咁。如果唔知啱唔啱食，可以试咗佢哋嘅Lunch Menu午市套餐先，有餐汤、沙律、主菜/黎巴嫩捲、甜品。价钱依主菜决定，最平$100起，绝对系入门体验价啊!!
店内宝蓝色墙壁、镂空雕花窗饰，俨如身处阿拉丁世界。
半户外座位系超人气打卡位，望住红砖古蹟「大馆」饮酒劲Chill。
【沙律6选1】
地道黎巴嫩菜有好多蔬菜、豆类、香草入馔，今次午市套餐嘅沙律前菜序幕就有6款拣，好似有羽衣甘蓝嘅Tabouleh沙律、淋上椰枣糖蜜嘅烤澳洲茄子、经典酥炸鹰嘴豆饼Falafel等等，选择几多。
呢款黎巴嫩经典沙律主要有羽衣甘蓝、番茄、小麦，丰富配料交织出口感层次，加埋柠檬汁清新爽口。
同样系当地经典小食，土豆粒炸到金黄酥脆，混合埋烤孜然、大蒜等香料，几有风味。
【主菜6选1】
切尔克斯鸡(Circassian Chicken)
源自土耳其嘅传统菜式，将鸡髀用面包糠、核桃、肉桂酱煮出浓郁香醇味道，用嚟捞饭一流呀。
鱼肉球(Minced Fish Balls)
平时中菜成日食到嘅鱼肉球，嚟到黎巴嫩大厨手上会加入红辣酱、混合辣椒，呢种香辣多汁食法几有新鲜感。
烤鸡肉串 (Shish Tawook)
食黎巴嫩菜真系唔少得肉串系列！“Shahrazad Lebanese”厨房仲有真·炭炉，所以呢度嘅炭烧肉串特别惹味㗎。
呢款烤鸡肉串会预先用多款香料醃制，再用烤炉烧到表面微焦，入面又锁到肉汁几正。
黎巴嫩烧烤(Shahrazad Mashawy)
肉控一定要拣呢款黎巴嫩烧烤，一次过试匀阿拉伯式烤肉，有烤羊肉串、鸡肉串、土耳其烤肉条㗎。
【黎巴嫩捲】
鸡肉捲(Chicken Roll)/羊肉条捲(Kofta Roll)/羊肉捲(Lamb Roll)
虽然Menu系写Sandwich，但唔系平时食开嘅三文治，其实更似我哋认知嘅肉捲，有鸡肉、羊肉条、羊肉拣。
饼皮薄得嚟唔会好干，内馅真系爆满烤肉，加埋啲蔬菜、蒜蓉酱几开胃。伴碟就有黎巴嫩炸土豆粒、沙律咁，选择困难唔知食咩好嘅话，拣呢款肉捲一定会啱食!!
午市套餐菜单
Shahrazad Lebanese Dining Lounge & Bar
地址: 中环云咸街75-77号嘉兆商业大厦2楼
电话: 23300242