平时喺中环都系去商场、大街揾嘢食，原来PMQ隐藏咗间高质泰菜“BKK”㗎!! 呢度由外籍大厨主理曼谷、泰国东北部料理，会用多种香料结合甜、酸、辣、咸，好啱重口味fans!!
而家12pm-3pm嘅午餐菜单，最平$38起就有烤饼配泰式咖喱啦。私心推荐试埋招牌泰式辣椒膏炒沙白 配免治鸡肉粉丝汤，粉丝汤铺满沙白，辣中带甜劲香浓，午市只系$148咋。
“BKK”12pm-3pm提供午市菜单，最平$38起就有烤饼配泰式咖喱啦。
原来PMQ有间高质泰菜。
木系环境好有东南亚风味。
【招牌必食】泰式辣椒膏炒沙白 配免治鸡肉粉丝汤$148
泰国东北部料理一向重口味啲，甜、酸、辣、咸都好有存在感，呢道沙白粉丝汤就好食到呢种风味喇。沙白系用泰式辣椒膏爆炒，连个壳都有嗰种独特辣中带甜味。
而且汤身浓稠，每啖粉丝都好挂汤。同时辣得有后劲，就算隔咗十几秒都有种辣喺条脷度湧上嚟，有种越食越上瘾嘅感觉好爽。
虾饼配虾沙律$98
食泰菜一定要食埋虾饼啊!! 呢度嘅虾饼仲要手掌咁大，系用靓虾肉自家打成，特别厚身弹牙㗎。
炸辣味鸡翼$98
呢碟炸辣味鸡翼完美结合咗辣+脆。鸡皮炸到金黄酥脆，咬开鸡肉仲好肥美爆汁𠻹。上面洒满泰式辣椒、炸蒜，辣得快又香口几冲撃。
香辣炒通菜
几个人share嘅话，好啱叫多个炒通菜。用咗香蒜、豆酱、自家制炒酱爆炒，未食已经闻到好有镬气啦。
【泰开心】Lunch食埋甜品
芒果椰汁糯米饭椰子新地
“BKK”嘅午市有埋甜品食，最吸睛一定系呢杯新地，好似芭菲杯咁丰富，放满椰子冰淇淋、芒果肉!! 食到中间仲会舀到烟烟韧韧嘅糯米饭啊。
泰式椰汁糕
钟意经典口味就有呢款椰汁糕，口感绵密。而且甜度啱啱好，轻甜带椰子风味。想再椰啲，记住饮埋即开椰青啊。
BKK
地址: 中环鸭巴甸街35号PMQ元创方A座Staunton地下SG09-SG14号舖
电话: 23300306
Facebook: https://rb.gy/kuaqjz
Instagrma: Bkk HK (@bkk_thaistreetfood)