上海美華菜館 (已結業)

2位入去問齊人未， 人齊拍安心或寫紙仔加量體溫基本野， 我地要求坐卡位， 佢就黎料卡位只可3-4人， 是但照坐圓枱。 叫野食要左粢飯， 豆漿加鍋貼。 但跟住又有2位黎， 又俾佢地坐卡位😡野食到， 鍋貼想要豆瓣醬， 竟然話冇， 我話廚房出菜位果面有， 員工話唔俾， 老闆話唔俾， 要攞自己拎😡 。當時只係諗拿拿食完走就算， 一路食都只係聽到員工幫客點餐態度極差， 客要求坐卡位，又係叫人坐圓枱， 直頭叫人食就坐， 唔岩坐就走啦😡以前肥老闆娘都寸， 但未至於咁， 今日收銀個女人既態度真係好似個個客欠左佢咁。 可能出左名巴之閉， 當食客非食佢地不可。食佢咁多年， 但真係冇下次。😡

一入到去同個後生侍應講話兩位，個侍應叫我企喺隔離等，因為仲有另外一位泊緊車未到。我本身覺得冇問題，淨係叫佢比本Menu我睇。之後後邊有兩個客人入嚟，個後生侍應叫佢哋坐卡位，跟住叫我坐一張堆滿雜物嘅圓枱，我見到都仲有幾個卡位剩就問我哋可唔可以都坐卡位，點知佢答我話卡位係四個人先可以坐。但佢係可以俾我望住佢比係我後邊入嚟嘅兩個人坐卡位但同我講卡位係四個人坐。佢哋完全唔理客人嘅感受都算啦，仲態度勁囂張咁鬧我話唔食就算。唔會再幫襯。

店鋪人員超有原則。過咗早餐時間，一定唔准喺舖頭食粢飯。就算你叫埋其他嘢都唔得。態度就有啲囂張，黐飯好唔好食就唔知，但係態度應該可以好一啲。如果純粹為食粢飯，應該有其他更好店舖選擇。白鷳一堂就無謂啦。

態度極囂張！假日和太太揸車過來食上海菜，我喺門口泊車2分鐘後到，佢要求我太太企埋一邊等，我太太話可以冇問題，然後話可唔可以點餸先，佢話唔得要齊人先(當時店面仲有四五張空枱),死都唔俾我太太坐埋先，然後鬧我太太唔想食可以唔好食！我從來未見過咁囂張嘅餐廳，第一次食評真係要奉獻俾你！

好掛住台灣嘅阜杭豆漿，一路都好想揾咸豆漿食，follow蔡瀾YouTube channel睇到呢間嘢，同埋屯馬開通真的很興奮就試試佢。鹹豆漿冇阜杭咁鹹，雖然油炸鬼浸淋咗，但到滿足到小編想食咸豆漿嘅願望。小籠包味道濃過咸豆漿，熱辣辣好好食。鍋貼油豆腐粉絲湯正常發揮，不過不失。栥飯肉鬆油炸鬼內餡，餡料多，好豐富，入面嘅油炸鬼好脆。各位記住以上早餐11點前供應，遲咗嚟到，有啲野食就會賣曬㗎啦，要食就要做早起的鳥。

我從來都未試過響呢度寫食評，但係今次真係好嬲，所以要留言一吓：今日一家5人，見好耐冇去食過，就去食吓，之前一路去態度都不至於咁惡劣！今日去到，佢話要分兩枱，我哋冇問題，3個，兩個分開坐！爸爸同阿女食完先俾佢張枱嘅錢，然後爸爸行咗出去！阿女碗鹹豆漿食唔晒就俾咗我哋清埋佢！當我哋俾錢嘅時候佢計埋嗰碗豆漿，我就話俾佢聽呢碗豆漿係隔離枱之前已經俾咗錢，跟住佢就開始上身咁，態度超惡劣，話係見碟收錢，我話我明白，所以解釋返俾佢聽呢碗已經收咗錢！佢又話如果你係商家，你會點樣計？我明確話俾佢聽我食咗啲乜嘢，亦唔會為咗$15呃佢錢，但佢言語間覺得我響度呃緊佢仲話今次當免費送一碗俾我食，我火都嚟埋，我唔係冇俾錢，唔需要你送俾我食！今次當一個教訓：1. 埋單要一齊比 2. 比咗錢嘅食物唔好帶去未比錢嘅枱！PS. 其實佢言語上已經非常惡劣同串，只係太長，不能盡錄！

特登由沙田搭的士過去唸住食粢飯同豆漿做早餐 佢哋話早餐時段到11點 ok無問題 本身都唸住嗌埋菜飯 咁之後問佢哋有無得散叫粢飯同豆漿 佢哋話無要食小菜 問佢剩係得早餐有粢飯豆漿？ 無人應我哋 之後再問另一個人 佢話幫我哋睇下仲有無粢飯 之後話仲有2個 話如果想要可以幫我哋外賣包起佢先 但我而家堂食喎 有粢飯唔可以直接拎過黎？ 粢飯點解一定要外賣無得堂食？ 同埋上海鋪得早餐先有豆漿？$23個粢飯一定要攞走先要得 拗曬頭同一肚氣就走左

呢兩年都會間中黎呢到食，食物質素係唔錯，樓面姐姐態度一直都幾好，幾nice，但自從6月開始，多左個應該係呢間店的太子爺之後，服務質素即刻下降。太子爺安排客人入去坐，係用「命令式」語氣講，當問樓面姐姐可唔可以轉位置坐的時候，太子爺會好緊張大聲講「發生咩事」，話要轉位既都一定要同佢講，其他人唔會話到事，呢種至高無上的態度，我會以為自己入左軍訓營。到落單的時候，佢會叫客人快d諗，佢好忙。佢咁忙，點解唔俾樓面姐姐幫手落單？情願用呢種語氣同個客人講野？當有客人食完，想再落單外賣拎走，只係一個粢飯，佢會同個客講要等20至30分鐘，但堂食的客，只要一叫粢飯，就會即刻有，咁點解外賣就等半個鐘？樓面姐姐都苦笑，話唔知點解要人等30分鐘。一間食店，食物幾好都好，如果無用心對待客人，只係show off自己係呢間鋪頭的權威，咁無客人會再返轉頭食。

本身食左依間野3，4年，間唔中都會黎，最鍾意個癡飯同油豆腐粉絲，最近幾個月太子爺（高高地，瘦瘦地）開始接手，近幾次黎到，佢d 態度極度惡劣，冇禮貌，又大聲，d 樓面啊姐都怕左佢。大大聲係門口叫人排隊啦，分兩條隊，堂食外賣分開排，但出面完全冇指示分開排。入到去，明明大把位，但唔比人揀位坐，被安排坐角落頭貨物區。要求調位仲被佢（太子爺）大聲鬧，落單同個客講「快啲講啦，我好忙㗎！」，我真係第一次聽人咁同客講嘢，想貼錢買難受可以去試下，個人覺得態度比澳牛更差。

土瓜環有地鐵之後，成日都想試吓土瓜環嘅美食，而且呢區有好多小店老店，今晚就諗住去試吓D小店、老店，但係結果非常之失望。離奇嘅係，上海粗炒裡面肉絲有D係酸😣，亦冇傳統上海粗炒嘅濃香醬油味，份量仲要小得可憐，椰菜都冇幾多😕。酸辣湯又係好酸，我哋全枱四個人都奇怪點解只有醋味😥，仲要好似漿糊咁☹️其他食物：麻婆豆腐、蔥爆牛肉、小籠包，全部都係好一般嘅味道，相信有其他更好嘅店可以去食，呢度唔值得特別去食。

第一次嚟，特登由鴨脷洲嚟食，食到一肚氣，冇下次，我叫小籠包，同豆漿。之後冇幾耐，個事頭婆，態度好差，同我講呢啲食物，只做早餐時段，我就同佢講，我點知道呢，，，最後都有食到，但是一肚氣，，，，結果冇下次！我後來先知，下午只做套餐，黐飯，鍋貼，鹹豆漿，生煎包等等。。。事頭婆又唔同我講，落完order，就詐型我，我同佢理論，佢又唔敢出聲，真係食到一肚氣。

呢間嘢係一間好奇特嘅嘢。老字號屹立咗喺該區好多年。食物質素其實都唔錯嘅，每次來都覺得食得開心。價錢越覺得ok。今次來買外賣嘅時候發覺一樣不能接受嘅嘢。就係外賣同堂食居然排同一條隊。排都差唔多到我哋嘅時候，發現有人就咁衝埋去買外賣冇排隊。後來發現個師傅同佢哋講如果買得少嘢就唔使排隊！咁好心你門口唔好咁大個牌寫住外賣同堂食排隊啦！同埋咩叫做買得多、買得少呢？呢啲係好個人好主觀㗎喎！買兩件三件究竟係多定少呀？真係令顧客摸不著頭腦，經驗十分不愉快！

呢間2老闆曾經點名粢飯嘅上海店，我哋都曾經慕名去排隊買粢飯，今次就坐底食午餐。Openrice 有唔少評語話佢哋啲人好惡，我哋由打電話去訂檯到未齊人入坐都戰戰兢兢 🤣🤣🤣打電話去佢哋就話過嚟就得啦，有位架，到我哋坐底咗就問係咪打嚟訂檯嗰位，好攪笑，乜幫我哋訂咗檯咩？未齊人問可唔可以坐住等，就好快安排入坐喎。由叫食物到食物上檯都好善良喎，一啲都唔係傳聞中咁差。但食物質素就有點失望，窩貼要早餐先有，小籠包同薰魚不過不失，但炒年糕太淋滋滋無咗煙靱感，窩巴個芡汁太水汪汪，掛唔到喺窩巴上。還是早餐比較好 🤣🤣

食物品質好一般 員工又未打晒針，每台只可以坐四個。 連點坐都要理。 炒年糕炒到勁冧， 冧到無唒口感同彈力， 比老人家食。 水煮魚好咸。稍為好食嘅就係高力豆沙初頭以為傳統上海菜應該好食，點知唔係嘅真心唔明點解仲有人嚟嘅排隊囉， 係咪土瓜灣冇嘢食？

今晚試咗呢間舊式上海舖，叫咗小籠包、酸辣湯、上海粗炒麵、薺菜雲吞同埋炒鱔糊一共五樣野。小籠包好搞笑，個籠超大但係就得4粒小籠包，味道幾好，皮夠薄。酸辣湯係舊式上海舖味道，入面有豬紅、荀等等嘅傳統配料，而佢嘅酸同辣算適中。炒鱔糊可以揀芽菜或者韭黃，我揀咗韭黃，鱔絲都算新鮮，不過份量比較少同埋都真係好傳統的油淋淋。上海粗炒麵唔夠入味，佢嘅麵條係比較彈牙，同其他上海舖食到嘅唔同，我自己就鐘意林d唔彈牙嘅，所以覺得麻麻地。薺菜雲吞最失敗，雲吞入面無乜薺菜，基本上食唔到薺菜嘅香味。