影片
食记 (19)
安蕎百日宴大家耐心地等開飯，各自搵娛樂，大家都又悶又肚餓，唯有各自玩電話解悶同分散注意力啦。好肚餓呀，仲未開飯呢。哈哈。恭喜百日賀宴，難得喜事令到各路英雄聚首一堂，而且唔係酒吧，太好喇 ﹗個個掛住賭，我都參與下啦，好采無輸，都贏少少。由頭賭到尾，好鬼爛賭呀 ﹗我淨係爛食爛飲加乍 ﹗紅雞蛋，有野食喇！未上菜先黎小食紅雞蛋，平時我都唔食熟蛋黃架，但實在肚餓，連雞兩隻雞蛋頂住先﹗乳豬全體，幾好好好，難得滿意。今次真係合格，不太肥而皮脆肉嫩，肉香不過咸，好味。髮菜蠔豉豬手生菜，好少參加壽宴，依道菜意頭係橫財就手？發財好市？好似怪怪地，哈哈。生菜爽甜，趙到索索聲。夾埋髮菜蠔豉一齊食好好味，蠔豉甘香肥美有咬口。豬手炆得不肥不膩，豬皮彈彈爽爽的，入味可口，唯獨無咩肉食。西蘭花炒帶子蝦球，蝦蝦蝦蝦球好咸呀！格硬吞落肚。假爽質地，而且細隻左少少。帶子還可以啦，都係略咸，最好食西蘭花卜卜脆又多汁，點蝦醬或豆瓣醬同樣美味。花膠肉絲紅燒翅，忘記了醋唔係要黎撈，係食完用黎清味蕾舌頭添，手快快倒左幾滴，無緊要。水準穩定，顏色晶瑩剔透，高湯香甜濃郁，質感黏而厚薄得宜，香噴噴又好食。每口夾雜花膠絲及肉絲點綴，味道跟口感即時豐富左。清蒸老虎斑，相機都未舉得切就已經消失左半條斑喇！我都唔執輸立即夾兩舊先影相啦，證明在座各位都非常喜歡食魚呢。熱騰騰冒著煙送到，我二話不說搶左半邊面珠登先，客氣生疏食少好多！出黎聚餐飯局必須要進取主動，唔係會好蝕架麻。面珠登係全條斑最矜貴，嚼勁非凡、彈力十足，而且滑不留口！沾上魚汁豉油那有唔好食之理。之後當然茅頭指向魚肚啦，魚肚膠膠滑滑又無骨，啖啖肉夠晒滿足！夾少少背脊肉試試，最後解決埋魚頭魚尾，連骨都損得乾乾淨淨。鮑片鵝掌扒椰菜，損腳指我鍾意 ﹗鵝掌非常滑溜，滑到夾都唔容易呢。表曾微膠黏黏的，趙落爽彈，再炆耐一點就更正喇 ﹗蠔油芡鮮味不咸不嗆，配上淡口鵝掌及多水椰菜，味道剛剛好 ﹗鮑片嚥嚥韌韌好有口感，含蓄淡淡鮮鮑味道，輕柔您的舌頭，合格。炸子雞，無話可說，做到首尾呼應 ﹗上半場蝦蝦蝦蝦好咸，下半場雞雞雞雞勁咸。微暖不熱不香，油淋淋肥騰騰，肥膏一舊舊，一件敝命，就算我有多麼愛雞都要放棄。乾燒伊麵，大路的腍劈劈、濕淋淋、脹卜卜，味道淡而無味又單調，加豆瓣醬都救唔返，失敗 ﹗臘味糯米飯，真係臘味？唔多食到喎，只有幾粒叉燒及大量青蔥囉，濕上豉油撈糯米飯，試一啖 bye bye。可能豉油皇炒麵配個皮蛋瘦肉粥會更好味囉 ﹗
继续阅读
住係新界區既親友不時會相約聚會呢間都係經常到訪既熱點之一餐具十分有特色，古色古香既公雞圖案套組重點係佢地既花樣保持得不錯，雖然有少許掉色，但仍算色彩鮮艷豐富滷水豬手作為冷盤竟然又唔會好油膩好飽滯喎:^0滷得入味，豬皮稔軟香口，佢處理得乾淨，食落係滑身易嚼既溫度較低，感覺上膠質不重，未有黏口，不過質感頗為爽口酸菜豬肚其實我都唔中意食酸菜，呢道只係淺嚐輒止酸菜不嗆口，偏鹹，爽而夠水分豬肚夠稔，爽口易嚼不會過韌，沒有異味鮮蝦腸粉腸粉滑身不易爛，帶點彈性，食落唔會好粉蝦肉都叫足料，爽口帶鮮香，色澤紅白分明櫻花蝦炒飯用石鍋熱住上，既能保溫，更有少許飯焦份量夠足，炒飯金黃乾爽，賣相吸引入口粒粒分明有嚼勁，帶飯香又無膩感加上爽口蝦肉既鮮香，以及青蔥既清香，整體感覺清新可口流沙包包身香綿軟熟，味道不太甜，平衡餡料濃味餡料橙黃色尤如日落，美觀又吸引入口甜而不膩，仲有點鴨蛋黃香只不過老實說不太流沙，只有少許溏心炸兩腸粉厚薄均勻，甚有彈性油炸鬼酥脆可口，中間既氣泡算均一，不算過份油膩既一綿一脆既質感對比幾有趣，這或許是此道多年受人歡迎既原因煎釀尖椒當中一半係辣口既一半係冇咩味既其實次次食呢道菜重點係要同人分，好似抽籤中獎咁，係好玩既xd釀餡香口不油膩，彈牙更帶點爽口，只係稍為鬆散未釀得夠紥實燒賣三寶蝦仁、冬菇及鵪鶉蛋作為配料，置於燒賣之上個人認為蝦仁一款最經典最保險，蝦仁足料又爽口，可惜鮮味乏乏鵪鶉蛋一款比較重負擔，蛋係細既但香氣頗濃，食落可能會覺得有點膩口冬菇一款則普普，冬菇爽口多汁無怪味，只係冇咩特別小籠包外皮算薄身，緊緊包裹肉餡及湯汁，一滴不漏湯汁不多，不算過於膩口，只係油香勝於肉香了肉餡爽稔夠味，很少脂肪，感覺紥實花生糯米卷如相中可見，捲得不夠紥實，說是鬆散也不為過單以糯米皮本身既黏力黎撐起整個結構，有點馬虎糯米皮香甜軟糯，十分綿身稔軟富彈性而柔軟，嚼勁不大黏度一般餡料甜度剛好，加上芝麻花生既自然香氣，當然是最佳配搭豆腐花滑身不會過水，感覺足料用心，而非所謂水嫩而實則偷工減料豆香不算濃郁，但叫自然，亦無粉粒滑嫩香口，灑上點點黃糖，真是兒時回憶！
继续阅读
今次唔係第一次黎呢間餐廳, 開左咁耐, 間唔中都會黎光顧下 :0今日係我媽媽的生日, 我地4個人9點正就黎到呢間鄉土風情,因為唔洗等位, 地方大而人又少慶祝媽媽生日, 係衝住佢平價點心而黎 爸爸諗住大家高興下就嗌左隻乳豬,我地諗住加多幾碟"餸"....原來唔可以又嗌點心又嗌3寶(大家, 真的要小心, 在餐牌上無寫明任何相關要求的附帶條款)最後我地都揀左食夜茶點心, 頭抽炒腸粉, 唔會太咸太乾流沙奶皇包, 裏面d黃真係流哂出黎, 夠熱牛肉球,鮮竹卷,鯪魚球, 都唔會太油膩, 不過爸爸就想食炸物..:333夜茶點心還不錯, 茶介位位$12, 收加一不過今次用餐經驗實在不愉快, 尤其是普通職員不友善的態度和過份強硬的處事手法好可惜媽媽一年一次開心既生日飯竟然搞成咁 唉!!好激氣呀真係! 希望全港唯一一間的鄉土風情有所改善啦.
继续阅读
就算星期五晚都唔多人，不用等位，直入。兩個人叫了煎蛋角鍋，蓮藕餅，安格斯肥牛粒，蒜蓉粉絲蒸元貝。(因為做特價$38／4隻），見個侍應主動推介，所以試下。)煎蛋角內有咸菜，好咸，一定要送飯食，湯底有D芽菜同硬豆腐，但豆腐無咩豆味。蓮藕餅煎得有D油，味道亦偏咸，而且有D碎豬骨，麻麻地。肥牛粒一樣偏油，而同碟的菇唔好食，有草青味。蒜蓉粉絲蒸元貝，好大隻，但唔鮮甜。整體味道偏咸同油，分量足，但味道普通，試一次就夠。可幸服務周到。
继续阅读
BB在外婆家住了一大段時日, 我爸也多個星期沒有見愛孫了. 星期日, 沒有帶BB回西貢, 爸媽就決定來大埔, 係要見一見BB, 才能安心. 太太另有事要辦, 那就餘下我同BB, 及父母一同上茶樓, 飲茶. 係太和邨, 有兩間茶樓, 而且兩間野就打正對面, 所以等位有兩個選擇. 除非係指定要食某一間, 那麼, 邊一間較快俾到檯你, 邊一間就做到你生意. 不過, 我一等, 就等了成個鐘. 才收到鄉土風情的叫籌. 等到位, 才call其他人出現. 星期日飲茶, 不嬲都係咁. 我為了陪父母, 父母為了看BB. 呢一餐, 也是志不在食的. 都是以點心為主, 一家人飲茶, 一向都是這樣叫到成檯野. 不過小家庭, 人少少, 就唔會叫咁多既. 我們三個人, 就當然叫個飯食下啦. 而香港式飲茶既特色就是集合大江南北, 世界各地的美食. 所以, 我們係呢一度, 可以食到韓式既"石頭鍋飯".這一個石頭鍋飯先上, 大概是因為廚房出錯單吧. 錯有錯著時, 醒目的樓面知道我們同樣叫了石頭鍋飯, 就先交俾我們. 火熱辣的牛肉石鍋飯, 未撈之前看見爽脆的新鮮芽菜. 撈一撈. 把韓國的辛辣醬汁撈入去, 熱咋咋的, 把飯汁肉菜撈一番. 撈好後, 辛口, 味道香, 飯焦脆卜卜. 芽菜就靠石鍋本身的熱力炒熟. 老土的形容一下, 這鍋飯, 真的是濃濃香香. 之後, 就是點心, 三個點, 就是平日飲茶常叫的鳳爪, 牛肉. 鄉土一點的, 來了個豬肚燒賣. 純新界式飲茶的點心. 先評鳳爪, 而家好多都只是豉汁鳳爪. 沒有辣椒圈, 豉汁既味道顯得特別的濃郁. 鳳爪, 走過油, 而且蒸得勁腍, 豉汁味亦滲入到其骨內, 是一籠出色的點心. 牛肉, 味道雖是鮮美, 但食落, 牛肉球既質感好似實左少少. 不過, 吃得出馬蹄粒, 牛肉球味道香, 加上喼汁令牛肉味道增強. 這小點, 也可以說聲好. 另外, 豬肚燒賣呢一個較為傳統的點心, 就令我覺得普通了一點, 應該落少少胡椒吊一吊味的但我們選擇了不落, 所以食落, 有少許覺得失色. 不過好的, 就是豬肚, 非常之腍, 可以說, 這豬肚, 仲腍過用來煲湯的豬肚. 最後, 也是傳統酒樓的常見物, 叉燒餐包. 包仔甜, 叉燒餡有粒粒肉, 內裡的叉燒醬也一樣的甜美. 想起兒時, 係茶樓, 食這些仿西式點心比起食正宗叉燒包, 更加之開心. 味道好, 地方也絕不鄉土. 不過, 要說這一間是有特式的食肆......在我感覺上, 這只是普通的一間酒樓. 不過, 食物倒是美味的. 而且, 這酒樓, 名是鄉土, 但完全沒有給人感受到鄉土的感覺......
继续阅读