唐記包點 (港鐵旺角東站)

营业中

休息中

作為一名健身教練，偶爾都只得15分鐘時間食個午餐今日好鬼趕，係旺角東站見到有間唐記包點啵，好啦! 拿拿臨買個外賣食, 一個北菇雞飯、燒賣、牛肉球、 蜂蜜紅棗生薑茶、 海鹽檸檬柚子蜜呀唔該。咦喂！全部都好熱，燒賣唔會散修修、口感唔錯, 牛肉球竟然比酒樓好食, 唔會溝左好多粉好淋咁、北菇雞飯既雞算幾滑。因為佢既野飲細細支所以就買左兩支, 柚子蜜比我飲開既較甜但有海鹽咸咸地幾好味, 相比之下我就中意蜂蜜紅棗生薑茶多d, 味道唔會太甜, 淡淡既薑味加紅棗飲落好有養生feel。兩碟點心一碟飯兩支野飲都係八十幾蚊, 非常抵食, 快靚正呀

平時想食啲輕食，又想食啲點心，唔一定要去茶樓既，唐記包點夠晒多選擇又方便，味道都有水準～～先黎一個糯米雞，想食就要快手，好快賣晒，非常足料，誠意之選，好味道！山竹牛肉，另加喼汁，肉質彈牙，略嫌味道偏淡～鵪鶉蛋燒賣，又一至愛，有蛋又有肉食，唐記既點心都無令我失望，原汁原味，係我既my favorite!除左點心，叫多兩個包點黎食，蒸包較健康，揀左菜肉包同番薯包～菜肉包成日都會食，有菜有肉，健康之選～番薯包就有新意，第一次食，味道都ok,甜甜地唔會太膩～另外叫左豆漿同奶茶，豆漿唔會太甜，剛好岩飲有豆香！

今日出門太趕唔記得拎飯，食飯時間就落左去火車站買唐記。之前仲成日話點解火車站未有，放完假就有了。章魚肉餅飯 $27一個圓餅型，上面有大有細章魚粒比唔同口感。因為肉餅有時會咸d，所以走左豉油。店員幾好問洗唔洗分開比d豉油我。飯粒爽口為主，配返蔬菜。蔬菜都知整定，但都keep住綠既。豉椒排骨飯 $27更加酒樓風味既蒸飯，唔同既係有菜配。排骨數量唔少，岩岩好做一餐。辣椒蒸到好出味，香而不辣，始終得一塊嘛，提味ok。排骨咬落都易咬，唔會話用牙車車車。唐記蒸飯好抵30蚊有找，午餐常吃！雞扎 $18依個介紹左好多次比朋友。因為好鐘意食雞扎，外面飲茶可能要廿幾蚊。雞扎入面有雞件滑滑外，仲有豬肚同芋頭。凍包同壽桃包都撈埋。蕃薯包 $8外貌拎到返去羞左少少，哈哈！一開4每人食口當甜點，蕃薯多纖維又唔會太甜。紅豆包 $8外型淡粉紅，美。食到粒粒紅豆，比蕃薯包甜少少。香滑奶茶 $12自家飲品，唔洗即刻飲留返三點三。茄子外型，茶底同奶各一半，包裝嚟講唔錯！