太興 (豐榮苑)

营业中

休息中

依家去茶餐廳食晚餐嘅價錢其實都係差唔多有得揀嘅情況之下其實揀太興都係一個幾好嘅選擇品質高味道好服務都唔錯最重要都係佢傳承左香港最經典嘅茶餐廳嘅小菜同埋最出名嘅奶茶最近佢就推出左一個優惠就係課晚餐有得揀茶熏雞同埋松子魚今次兩個都試晒而且覺得佢哋都各有特式首先講吓個茶熏雞其實我覺得佢啲肉幾嫩而且而且感覺到茶葉嘅香味係入咗落去同我地平時會識到嘅非常唔同係一個好創新嘅菜式另外松子魚賣相雖然一半不過味道亦都好好重點就係成條魚都已經去咗骨炸到炸得幾出色用嚟送飯就一流我覺得性價比都幾高記得一定要配埋冰鎮奶茶咁就係最好嘅配搭

下午茶時段入座，叫咗個輕盈燒鵝湯米粉，價值$40，都真係好鬼輕盈。個米粉少過半碗，d燒鵝得幾粒又勁多骨。呢間舖仲要好污joe 。最慘係30幾度個冷氣唔凍，食到我地成身汗，條街有少少風都涼過佢。有店員話已經開到最大，有其他話壞咗⋯總知overall 經驗太差。

行到邊區總有間太興，但如非食到冇得揀，都唔會食，於普通茶餐廳無異，但價錢係以倍計。今日喺東區裁判法院做完嘢已經係下午茶時間，街口就係太興，就腳嘛，總是最好的藉口，同行朋友話要食，咁就食啦，心想穩陣啲，去到食燒味冇死囉掛～可惜，可惜～張相好吸引呢？而我又真係想食咁多款嘢，就係你啦～兩粒星係比啲鹹蛋、紅腸、油雞同燻蹄嘅，啲飯好彩有豉油先易入口啲，硬到一個點，最令人震驚嘅嘅係嚿叉燒正所謂有圖有真相，又瘦又乾嘅叉燒，硬繃繃，練牙力嘅好工具！？我知一睇就知道係尾位，咁都可以飛咗佢掛？明唔明咩叫做“眼不見為淨”？咁嘅質素，真係唔好擺上檯比啲客食啦！聽聞太興本身係有品質監控㗎，有監控都搞成咁，冇嘅話會變成點？好難想像⋯⋯

XO醬鷄柳炒銀針粉 ，高級咖啡 ，下午茶套餐，51蚊，份量都不小，都有D香味，食落有XO醬味，個D鷄肉都不是死的實實，牙菜洋蔥亦無過火，好爽口，幾正斗．杯咖啡應該唔係即磨，但不差有香味．食食下聞到有熏香味，原來是燒鵝出爐，睇下個牌，一隻都像428，唔貴呀！師傅見我望望下，即刻叫有賣番隻，我話二公婆邊食得哂，佢就叫賣下庒125，加多30蚊义燒，就唔洗煑餸．又比太興呃咗壹百幾．太興話鵝乸正，我屋企個隻又係⋯⋯

平時冇寫開食評，今次真係好嬲！呢間太興已經食過好多次，之前食開都正正常常，今次午市外賣燒味飯，以前有外賣優惠，$4x就有雙拼飯，而家已經冇咗，收$68就做就咗呢次恐怖經歷。。叫咗燒肉切雞飯，熱奶茶，一打開膠袋，已經發現杯蓋係未蓋實，冇咗大半杯奶茶，全部野濕晒，又冇比糖，諗住都算，打開飯盒，比錯咗叉燒拼燒肉，啲燒肉皮已經唔脆加上係勁咸同硬，好似食緊香口膠咁，完全係食唔落嘅感覺，叉燒都唔見得好食，就連啲飯都一舊舊，啲質素最多值$2x, 超市都好食過佢，如果係堂食一定會叫佢換過，真係唔明點解可以收$68！絕對冇下次！

今早係假期起身晏咗，出去食早餐已經過咗時段，去咗太興食個午市套餐點咗個星州炒貴刁，加一杯冰鎮凍奶茶，$62炒貴刁有义燒絲同蝦球，幾新鮮同有甜味，微辣可口又開胃，份量都唔覺細碟，炒熟嘅洋葱條好香好甜，配搭得好合適，增加胃口！果杯冰鎮奶茶係招牌之作，夠滑口，可惜放在杯外D冰唔多夠，只浸到杯嘅三分之一，效果差咗一D！

又到了一個人的晚餐的時候，呢排成日落大雨想去遠小小的地方搵食都唔得，所以近近地就去了屋企樓下的太興燒味食晚餐。一入到太興坐低後，睇睇餐牌原來近年的太興除了賣燒味、燒味飯、炒粉麵飯出名外，還有多左很多住家小菜選擇，不過一個人食還是想食牛柳絲瑞士汁炒河($60)，牛柳絲入口嫩滑，用瑞士汁來炒使河粉味道香甜，味道真的是冇得輸。不過就炒得有少少油膩，相信呢餐吸收了不少卡路里了。另外，原來星期一至五的晚餐，只要叫餐牌上的食物，就會包埋飲品，不用額外加配飲品，我就叫了凍檸樂 (+$3)，價錢較附近的茶餐廳算是收得便宜。

一個晚市餐牌上既鹹魚雞粒炒飯，收你$60，但份量重少過下午茶，好過份，d飯好貴咩？d餸，雞粒，鹹魚等等少都算，唔係連飯都慳呀。味道已經好一般，好心就唔好咁慳啦，話哂都係大集團。

太興嘅冰鎮奶茶應該無人唔識佢，飲過呢度嘅奶茶真係番唔到轉頭，有人會覺得太甜，但我覺得還不錯！！！但有冇人知道呢度嘅早餐都好多人好鍾意食，其實只係普普通通嘅餐蛋米粉，但係我每個星期最少都會食一次，果兩塊厚身嘅午餐肉真係煎得好香脆，硬係覺得唔同普通茶餐廳，再加上嗰炒蛋炒得岩岩好，保留左小小既蛋漿，同埋呢度嘅米粉個質地係我鍾意食嘅，有啲茶餐廳啲米粉好淋，浸埋湯上枱簡直唔使食！！！今日就唔飲冰鎮奶茶，飲熱奶茶，一樣都係好滑好香濃嘅茶底，太興啲食物係有質素嘅！

假日出嚟食飯，周圍都大排長龍，最後因為唔想等位黎咗太興食晚飯。 今次係第一次嚟太興食晚飯，估唔到會有意外驚喜。首先我哋點咗個燒鵝達人，燒鵝燒得好香，肉質嫩滑唔多骨，而且唔會太韌，醬汁酸酸甜甜， 非常美味， 好媲某米芝蓮知名燒鵝餐廳。野菌蝦仁炒蛋比想像中細碟，但係味道的確唔錯，蝦仁夠大隻，而且好新鮮，蝦仁爽口彈牙，炒蛋都夠滑，再加埋野菌同埋香蔥嘅配搭， 炒出黎好香，送飯一流。檸水唔會太酸，味道啱啱好。下次如果大家想去食晚飯，不妨試下去太興碰碰運氣，可能都會有意想不到嘅驚喜。

是晚唔知食乜好，就是但幫襯屋企附近嘅太興，因為好耐無幫襯，之前又聽同事講太興而家d小菜都唔錯。於是咪去試下啦！是晚叫咗個所謂上湯海味雜菜煲(輕量級)，首先個煲一d都唔夠熱，白洽菜，個煲幾乎搵唔到海味，最後搵到幾粒碎蝦乾同一塊超韌嘅魷魚，我估已經代表海味嘅存在啦。另外，叫咗一碟星洲炒米，白洽米粉再加咖喱粉炒，又唔混又冇料，中間d米粉一d味道都冇。講真，可否向香港海關投訴呢？商品説明條例與圖片不附(當然所有menu 都會有句圖片只供參考)！是晚覺得最好味嘅係杯柚子蜜！

現時香港稍為貴少少嘅茶餐廳相信係太興或者翠華都可以代表到不過從價錢上太興似乎性價比高啲啲因為翠華實在拍得住西餐廳嘅價錢而作為本地代表嘅茶餐廳其實唔使太貴都可以今次自己一個人嗌咗一碟乾炒牛河配豉油王醬汁做晚餐。當我以為佢同普通茶餐廳嘅乾炒牛河一樣嘅時候食完之後我發覺其實系錯首先整體嘅賣相都會比普通茶餐廳好少少第一啖先食啲河粉味道稍為甜少少可能因為本身個豉油係甜豉油所以唔會覺得鹹雖然有少少油但係都帶出左好大嘅鑊氣表現唔錯至於啲牛肉普通茶餐廳啲牛肉都係一塊塊稍為口易太興呢間啲牛肉反而係切成牛柳絲所以咬起上嚟唔會太韌而且都好夠入味所以整體上來講性價比都幾好唯一美中不足就係價錢始終都稍為貴一碟要＄60

近排天氣開始凍, 又係食腊味的季節. 我好鍾意食腊味, 年年都會買一堆返屋企. 今日 lunch 經過太興, 見到大大張腊味廣告, 就想試下. 好味就買 d 回家啦. 一個人食飯點都易搵位. 排隊只係排左1-2分鐘就入得喇. 每張桌上都貼住呢個腊味廣告, 我就叫個菜遠雙腸飯, 試曬2隻腸.雖然叫"菜遠"雙腸飯, 但菜既份量真係太少...... 而呢碗飯, 膶腸就2條, 但腊腸就一條. 份量都算多既.  味道方面都唔錯，夠香濃唔太喊，送飯剛剛好. 以腊味來講肥糕都唔算多. 整體都比大部份茶餐廳既腊味好味！加埋杯 OT. 正！

太興一向都有質素既保證，今次同同事食lunch，叫左2個餐。我就叫左個冬瓜粒蠔仔肉碎湯飯，估唔到咁足料，冬瓜粒size岩岩好，唔會煮到淋哂爛哂。而d蠔仔都好大隻，而且好新鮮，唔會有腥味。同事既鹹蛋肉餅飯都好吸引，d肉餅肥瘦適中，個鹹蛋黃好香，重點係d甜豉油，撈飯真係一流呀！

打風後家裡無煮飯，我們就大概5點幾出門口，就同屋企落去茶餐廳食飯，結果睇完幾間都係去太興食，因為坐位比附近餐廳坐舒適一點。我們點左一個下午茶餐，一個晚餐大家share黎食😽😽我們點左：1）鴨腿湯飯（下午茶餐）本人是很愛湯飯的，這個湯飯味道很不錯，做得很入味，足料鴨腿很大舊多肉，食到我們😋😋2）叉燒鹹蛋飯（晚餐）叉燒都味道不錯燒得剛好，又唔會俾太肥或太瘦，再加埋鹹蛋送飯，簡直正啊😆加埋餐飲：熱鹹檸水清新、舒緩喉嚨，十分舒暢！整體來說是個愉快又溫馨的晚上😊