奇華餅家 (已結業)

一盒四件, 唔知點解個白雪雪糯米皮有好多點黃色, 不過盒盒都係咁, 我諗係材料的顏色, 一口咬落去, 嘩!!!!個皮超煙un, 好正!!! 但係入面個黑芝麻太過乾身, 但食落都好香, 而且又唔太甜, good !!!!!

20041222 10am早餐, 買o左個柞菜肉鬆包($4.5), 再+$3加多個統一出o既Meee 雞蛋豆奶.個包好乾, 肉鬆係乾, 柞菜都係好乾.btw, 盒豆奶難飲到爆! 怪味!

今早行經奇華,見到本周推介係新出既牛油朱古力曲奇,本來$8,$6.5,所以趁平買黎試,其實食落又特別,係圓形既,中間係朱古力曲奇,外圍普通牛油曲奇,朱古力味唔夠濃,而且係硬身曲奇而唔係鬆化個種,我無咁鍾意,始終都係佢既黑芝麻蛋白曲奇最好食!

琴日見到奇華有晒三款趣寶,就一次過買晒,每包五蚊,見佢一包有起碼二十粒,都算抵。海苔味好有紫菜味,幾好食,食到少少牛油味,但係又唔會太甜,有少少似得意動物餅紫菜味個隻味道;咖啡味一折開已經聞到咖啡香,一食,咖啡味濃!不過原來係有合桃架!我都係買左至知;至於杏仁味,就比較清淡,似牛油曲奇再加上杏仁味道,不過難得杏仁味都幾出喎!總括而言,三隻味都好食, 但個人口味就覺得海苔味最好!

一盒有4粒，$8。而且有四種口味，最好味是花生同黑芝麻，但略嫌餡太少。另外椒鹽扭紋條都好好味，買回公司做下什茶也是不錯的選擇啊！

奇華既火腿芝士包特別在包餡唔係係包心.而係外露既,而且芝士係一塊,而唔係溶左個隻。一個圓形芝麻包,中間切開,放入一片火腿,一片芝士,食落有少少似食火腿芝士三文治既感覺,唔同係個包真係好多芝麻,真係好!不是,可能係食慣左一般既火腿芝士包,我覺得都係用溶左或半溶既芝士好味過一塊塊。

一向怕肥又鍾意食肥野既我,前幾天好想食cookie,見倒哩度有d係用蛋白做的,即刻令我心花開!買左杏仁味, 味道都好勁杏仁味, good!食食下, 見倒第一成份係牛油, 唉...哩個世界真係冇十全十美既野ga

對曲奇情有獨鍾,一食就唔停,呢隻曲奇每件細細粒,成朵花咁,又香,一包十幾二十粒都可以一次過食晒既。雖然表面見到一粒粒既黑芝麻,但係其實無乜芝麻味架!曲奇仲一d都唔油,食得過!

我好鏟意食依度嘅鳳梨酥，好香好好味。有原味、蛋王、哈密瓜、合桃、芒果，款款都好味。而我個人就最鐘意原味喇。

去到奇華,見到有蜜瓜味既雪芳蛋糕,青綠色,從來未見過,覺得好特別,所以買一件試下。又唔錯喎! 一拆開已經有蜜瓜香,食落真係有蜜瓜味,蛋糕質地都算軟,味道可以話係清清地,幾好食!

呢個以前未見過,係新出既,一條家庭裝,外表黑麻麻唔討好,但係要記住包不可以貎相,試過就知真材實料!何解?因為一般黑芝麻包通常只係包裡混入黑芝麻,包面再灑上黑芝麻,奇華黑芝麻包除左咁之外,仲有黑芝麻醬,呢個係我無諗過既,所以個包有好濃既黑芝麻味,而且又唔太硬,幾好食!

星期六晚聽歌神，見話會唱過十二點，就走左去奇華買定包包以防萬一。入到去，見到呢款包包$9大大個(長條形的)，表面又好似幾多黑芝麻咁，哈哈，仲唔係你???一打開個袋就唔係太勁的芝麻味，但食落口就幾有同幾香，加上佢中間有一層黑芝麻醬，甜甜地都幾好味。其實我都幾鍾意幫襯奇華，佢D包俾我的感覺係幾"實而不華"，唔會一陣風咁食完乜都無...其實，在奇華我的至愛係龜包，雖然係齋包一個，但食落去好有口感，次次入到去唔知揀邊款包的時候，龜包就會係我的選擇，不過，我發覺龜包的價錢已經在不知不覺間由$3.5加到$4....

琴晚食左個奇華既全蛋馬仔,值得推介俾大家。鬆化,有蛋味,甜得黎唔過份,又唔太油膩,食完唔會覺得個口油淋淋,同埋佢有獨立包裝幾好,夠衞生,又可以唔使一次過買咁多!仲有合桃馬仔,但係我唔太鍾意合桃,無諗住試.另外,我想一讚呢間分店店員既服務,佢地好有禮貌,由我一入,去已經叫客人慢慢揀.我揀左好耐,仲拎起過好多款黎,佢地都一直保持笑容,期間亦多次叫人慢慢睇,我覺得抵讚!

食過奇華既綠茶輕蛋糕,覺得好好食,所以琴晚試埋綠茶卷蛋糕,果然無令我失望!蛋糕質地唔太硬,剛剛好,而且難得食到綠茶味,有綠茶香,忌廉份量適中,唔會過多,我覺得同樣好食!

星期五經過奇華,見到promotion 係$7兩件黑芝麻蛋糕,於是買左兩件黎試,都幾好食。先解構一下…一片黑芝麻蛋糕其實係有四條切成條狀既黑芝麻蛋糕,每條之間夾住黑芝麻忌廉,忌廉充滿黑芝麻味道,令成件蛋糕都好香,而且仲係獨立包裝。鍾意黑芝麻味既可以一試!