巴蜀烤全魚 (已搬遷) 新店位置

2008.10.01(三) 睇完國慶煙花黎到已十點半，仲要等...機乎全日都係處於"等'既狀態，等升旗﹑等煙花﹑等開飯，莫非香港人等出個癮來 今次已是第三次到來，記得上回魚湯既甜美令人回味無窮，煙花過後八大一小專誠由尖東行路到紅磡，誠意二字已刻在額頭上，何解竟落得如此下場 上兩回已嚐過香辣魚既"攻"力，這回轉口味試下酸菜，真係好驚嚇 除賣相夠飽滿及酸菜夠酸之外真找不到半點特色，味道亦不及香辣來得刺激興奮，可說是平平無奇。再講，上回令人回味無窮的香甜魚湯亦不知去向，同樣的兩個蕃茄肉碎魚湯米線及豬潤魚湯米線，竟然弄成這樣子簡直慘不忍睹，蕃茄魚湯成個湯面都係泡令人大惑不解而且得個"酸"字半點魚湯味也嚐不到，米線激"淋"如"粉仔" (先生眼花呀，我地唔係無牙婆啵) 而豬潤不明加了什麼潤滑得如此利害，片片細細塊全是滑溜溜，口感古怪。反而無敵J 的雞翼米線露出一絲曙光，米線不題也罷，炸雞翼倒香脆咸味適中，反比他們的什麼秘製雞翼來得出色。埋單 $680

數月前來午膳吃米線時,已想著有沒有機會三五成群來吃燒魚.這一夜,即慶之下,終於同幾位辣仔辣妹朋友前來.其實巴蜀烤全魚本來是次選,但眾人期待的聯記川王仍然休業,幸而一早有兩手準備,預先在聯記之不遠處的巴蜀訂了位.所以未致方寸大亂.奇雲兄說自從三國演義之後,很久未聽過巴蜀這個地方名.就算訂了位,也要等上一會,臨入座前店方會開始準備烤魚,所以坐下不久,兩條預先預留的烤魚陸續上桌.一個麻辣一個酸菜,事前兩位麻辣狂人M同A小姐,保守起見不要大辣,只要中辣.兩大盤原條大鯇魚,場面壯觀.先吃不辣的酸菜,味道酸味味,吃正浸到軟稔的蒜子,更為惹味.因為酸汁不算很霸道,所以鯇魚肉的鮮味,也盡收舌頭上.小時候很怕吃淡水魚,因為其泥味很重而令到小弟卻步,直到長大之後口味有所改變,鯇魚片,魚腩,魚卜,煎釀鯪魚等等,已經成為小弟的最愛.這一次的原條無泥味的大鯇魚,又是做得出色,食到變成一隻貓.再吃麻辣的烤魚,鯇魚皮帶點焦,十分香口.麻香四溢,中辣來說又不是很刺激,吃到差不多尾聲,燒盤上的麻辣汁越濃縮,味道亦開始越來越出.其他食品如魚湯魚卜,魚卜還帶有一點點腥,還是用薑荵爆才正中我下懷.反而牛展很好吃,尤其是將牛展

今次真係専誠黎食, 因為回味上一次好好味的魚湯......可惜, 嚇親我...差左咁多蕃茄肉碎米線+豬潤 -- d湯好"傑"肉碎太多一d魚湯味都冇, 仲有d豬潤...掩到滑得濟, 唔新鮮扮新鮮咁....口感其差。老公叫了雞件米線, 又出事, 成碗雞油咁, 點敢飲d魚湯。今次還試了咸菜烤魚, 味道都ok, 但都係香辣好味d。整體水準大跌.....好失望。

今日諗住專登去聯記買外賣，點知仲未開，門口張notice明明話十月一日開架嘛！Why Why Why? 不過我而家知道點去喇，我一定會"揀日重賽"，再去過嘅！聯記無開啫，都要食飯架(雖然當時只係下晝五點幾)，但係我同大嚿朋友都覺得OK可以食晚飯喇喎，咁就去我哋預先諗定嘅後著- 巴蜀烤全魚！當時入面都已經有幾枱食緊喇，居然都有人咁早食晚飯??咁我哋叫咗麻辣大邊魚啦(跟兩碗白飯)，兩串羊肉(一大辣一中辣)，仲有魚湯菜心！魚: OK喎，最初食無咁入味，但差不多食到尾就好夠味喇，但魚肉都滑丫！飯: 估唔到都幾好喎，唔太軟又唔太硬，我唔鍾意食白飯都食咗大半碗，大嚿朋友食埋我果小半碗囉！魚湯菜心: 穩穩陣陣又OK！羊肉串燒: 好咸喎(大辣都唔多辣)！無叫小食，因為之前睇過食評話麻麻哋丫嘛！總括而言，食烤魚係唔錯嘅，米線就無機會試喇今次，唔知仲會唔會再去呢，因為我哋真係要專登去搵食架咋！下次要食聯記川王呀！可能今日假期，六點左右都滿坐喇，我哋都覺得早去食係正確嘅~

每次經過都會大叫一聲巴蜀烤"金"魚e~好奇怪耶~(哈哈......)上個星期六到此一試~叫左番茄肉碎魚湯米線($28), 魚鮫魚湯米線($32)眼見隔離枱食麻辣全魚, 真係有d心動但得兩個人, 條魚又好大條細條都要$90所以決定放棄番茄肉碎魚湯米線先到, 湯確實冇味精,濃濃o既魚味, 但一d都唔腥, 加上酸酸地o既番茄味好味~番茄魚湯比淨魚湯好味~魚鮫魚湯米線, 未黎之前唔知魚鮫係魚o既邊度, 原來係魚翼......好滑好好味......碗米線都ok大碗~

水準參差不齊，上菜慢又要想食客快點走。入座時服務態度極差，居然對著我講：「我現在唔做你生意呀，您走啦」真係開埠以來相信係首次有店員是咁樣來趕客，唔好忘記係佢自己安排我入座，菜都未點未食，居然講這些說話。食過兩次，第一次是ｌｕｎｃｈ時間食，師傅好有心機去烤魚，煮出來魚皮都脆的。第二次食則是晚上，由於客人較好，師傅煮魚馬虎，真蒸條魚出來便算，完全沒有烤魚的感覺，花２００元食鯇魚，倒不如去大酒樓正正經經蒸條魚食。另外叫了個魚卜米線，全條魚食晒都未來，齋等。（隔離幾枱都係咁情況）另外一項巧立明目的則是１８大元的配菜，請大家不要加配菜，返正加左都係等於有加咁，配菜＝大豆芽＋秀珍菇＋金茹＋香芹，每樣少許，不如將配菜的錢叫兩條串燒食仲好啦。整體而言，晚上人多不如去啦，廚房根本負荷唔到咁多ｗｏｒｋｌｏａｄ，引至水準下降。大家食鯇魚，不如在家中自己蒸啦

魚 .... 冇錯係好滑 ..辣 ... 就一d 都唔辣 ..完全感覺唔倒條魚有任何"麻"或者"辣"既存在 如果要夾硬點汁食 ... 好似冇乜必要去 .或者 ,點汁都唔係問題 .之但係 d 汁都係既唔麻又唔辣 .好無言 .另 ,service 好差 .

2008.08.29 (五) 人生能有一個相同喜愛覓食的知己確實值得開心震奮跟易爆奪爆來嚐嚐香辣魚滋味兼首次品嚐魚湯米線既魅力。蕃茄肉碎魚湯米線 ~ 冇得頂，明白真愛難求既道理。香濃魚湯獨領風騷，陣陣蕃茄香並無遮掩魚湯既香甜，對我來說肉碎過多，米線略淋不能與魚湯互爭長短。 豬潤米線也是不錯的選擇，惜豬潤搶奪了湯底香味，豬潤味較為突出。介紹友人既香麻味烤魚絕無失禮人前，必定結伴再來。

愛魚如我，怎能不吃離宿舍只有幾步之遙的巴蜀烤全魚？中秋佳節的前一天，定了一整條泡椒烤魚，曾經親如家人的suite四妞兒相聚于此，過把癮。大隻的鯇魚勝在抵食，鮮滑度自然及不上前日在又一棧的桂魚，但也尙算滿意。剛開吃時或會覺得味道偏淡，隨著烤的時間拉長，醬汁愈發濃郁，魚也愈發焦酥入味，泡椒結束慢熱階段后，開始大顯其能，配上『老干媽』豆瓣醬，令三斤的大魚，被剃到魚骨一絲不掛。另加$18的配菜有金菇、秀珍菇、芽菜和洋蔥，可惜份量都幾微，尤其是菇類，想吃到真是如同大海撈針。同場分別$15涼拌青瓜與涼拌萵筍都是不錯的佐魚小食，調配的醬汁蒜與醋味頗重，十足北方風味，香港人或許食不太慣，我就幾欣賞其。美中不足是萵筍不夠新鮮清涼，如果再凍一些會更好。幾個為食女一路食一路讚，亦不忘分享各自假期的奇聞軼事。這熱辣辣的兩個鐘，就在不知不覺中，飛逝了。

久聞巴蜀烤全魚的大名，趁是日較為空閒，兩人專程去見識一下，看那烤魚有幾巴閉。見呢度除左有招牌菜烤魚外，也有不少人在吃米線，但專程來到，無理由唔食烤魚咁"茂李"。五種味道的烤魚，最後揀了香辣味烤魚，要中辣。為了多試一點其他東西，就只要了一小邊，索價也要90大元，另加了18蚊配菜，即芽菜、秀珍菇等，放入去一齊烤。而烤魚以外，亦點了青瓜和羊串，還有兩枝可樂解辣。涼拌青瓜最先來，只得幾條青瓜，硬而不爽口，鮮味欠奉，蒜茸又不夠，只得一丁點的麻油味，頗為搵笨；羊串相對比較好，起碼肉不會太乾太硬，羊串上鋪上香草和辣椒粉，但中辣的羊串，為何一點也不辣呢?主角香辣味烤魚終於上場，用上的是低價的鯇魚，魚肉本身不算太滑。至於個醬汁，基本上全都是油，既不香，也不辣，就連浸著的秀珍菇及芽菜都沒有太多辣味。直接一句，這道菜與香辣味完全扯不上關係。是它一時失手，還是我太挑剔?飲埋枝可樂，兩人抱著點點的失望心情繼續行程。

綱上有好多人講這間新開食店,專登係香港過紅磡試試,試完極之失望。4個人叫兩碗米線,兩條大邊魚,首先牛肉米線d湯冇乜魚味有d雞精味,可能魚湯魚種類太小吊唔出魚味,有d牛肉有渣有d太林冇牛肉味普通貨色,肥牛米線1望d肥牛就知平價貨我就冇食,羊肉串烤得太乾味道1般,涼伴青瓜賣15元得幾條揾笨之作,主角出場首先上條香麻,魚幾滑但唔香唔麻又唔夠味好淡配菜又冇味又小,d菜冇比上湯“喂過所以冇味,1路食靠佢個魚湯令到個魚有d香麻味,火係中間4邊都唔熱,魚開始過熟有d“鞋,酸菜仲差因為d酸菜完全入唔到魚身,四川酸菜煮魚好入味好好食,這種食法魚還魚,酸菜還酸菜入唔到味,地方又太逼,同埋這種食法太唔衛生,大家落對筷子係咁撩。跟飯碗飯太細,埋單3佰幾覺得唔值。返到屋企成晚都好口乾,自己就唔會再去大失望。

因為小弟鐘意食魚又鐘意食辣的關係, 昨晚相約友人到來試菜. 訂左8點 7點半已到, 剛有人離坐唔洗等.good三個人叫左以下食物牛肉魚湯米線 - 滑牛有"拿"過但冇蘇打粉味, 幾好. 魚湯好鮮味唔鐘意食魚的朋友最好熱食唔係可能會覺得腥. 米線唔太林冇發漲, ok!羊肉串 - 叫左中辣, 好多孜然粉, 正. 有肉汁唔乾但中辣似乎有d呃人因為三個人一致認為呢串野辣過條魚.....麻辣魚大邊+2份菜 - 一上台已經好興奮因為真係好香同埋好大份. 正!. 但見到佢未出煙所以都等左兩分鐘先開動. 鯇魚肉唔腥冇泥味非常滑, 正! 夾埋d燒過o既豆豉一齊食真係正到暈. 但最最最正都係d 魚皮, 燒得好香, 鐘意香口的朋友唔好將魚皮放入湯,因為咁先夠脆. 同坐友人唔太食皮所以全條魚d鯺位都比小弟充公. 好少食魚食到咁滿足, 食左碗半飯!美中不足係配菜唔算多, 同埋個盤的四角都不熱, 要將配菜搬返中間.三個人連野飲埋單220左右, 絕對可以再返兜.

有次係大環山游完水行番屋企經過呢間好似係新開既小店番屋企睇OPENRICE就見到好評升幅第5位!即刻好想去食! 真係好想試條魚 不過同男朋友得兩個人咁.所以就叫左*牛肉魚湯米線, *雞件魚湯米線, *烤羊串, *秘制雞翼*烤羊串 好好好好味 !本身就好中意香草味既野 我覺得好入味 好好味喎!*雞翼真係好普通番到泥先知道原來已經有OPENRICE人士講過唔好食 -_-** 我發現我同男朋友個湯係唔同架 !我就覺得雞果個湯好味D !不過鮮牛肉真係好滑好好味!(而且仲送兩個豆卜架! )個湯就堅係好正, 不過米線相比之下就比較普通.下次一定泥食魚 : D

睇左咁多食評都好想去試試，就上星期日同朋友去試下，香麻辣味烤全魚 真係見到圖片都流晒口水，叫左1碟小邊, 仲有青瓜同 巴蜀辣香雞翼，仲有兩碗魚腩米線，招牌菜香麻辣烤魚真係 超級滑，放上枱辣香真係想成條魚放入肚，仲忍唔住飲係咁飲汁，好食。青瓜都想得幾爽口，有少少麻香，食完辣可以清下個口。雞翼就凍左d，冇乜味不過啖啖肉，埋單都係百零蚊，好抵食。

08.08.09 (六) 真係好，Gin 兄剛放學孖埋我地一齊黎烤魚。晚市真係座無虛席，七點半到只得兩張吉枱，後者又要等。烤魚有五個味選擇，順應特式嘛就揀最辣既 "香麻味" 連兩碗白飯另加$18 配菜 大豆芽﹑秀珍菇﹑金菇﹑芹菜 等放在烤魚盤底，不過每樣得 D 咁多多 魚 SIZE 分小邊﹑大邊﹑全魚，价分為$90﹑$117﹑$170 (九折計) 正价唔知幾時先用？!小姐話我地三人揀大邊就夠食，另小食有風味羊肉串(大辣) $9 x 2，秘制雞全翼 $10 x 2，涼拌青瓜 $15，鴻福堂飲品 $10 x 2﹔因此烤魚不入套餐之列，所以飲品以正价計算，小姐話米線三幾十蚊才是餐喎，認真古怪。涼拌青瓜得果幾片，味又怪又唔涼快不吃沒損失﹔雞翼只得熱&皮脆 WHY 冇味既，唔通巴蜀既雞翼係唔洗腌咁出色﹔風味羊肉串就幾掂，兩位男士一至讚好，我一向怕羊"騷"都試了一口 Sorry 吞唔落添 魚係鯇魚以勁多椒遮蓋住魚身既賣相幾得有特式，感覺真係幾似置身响大陸咁，不過個魚頭就帶有少許驚嚇成份 大邊真的足三人份量而且越食越辣&越食越慢，現場看機乎一枱一爐，等枱既朋友們真係要俾D耐性至得。埋