愛心快餐

营业中

休息中

早更收銀服務差態度超差，講野又寸。事件一，服務態度惡劣，中午12時，眼見早餐牌未收，以為還有早餐買，收銀八婆說幾多點呀仲有早餐賣。事件二，亂收錢，買個豬抑包+8元可加湯。收了我正價湯，之後我看到水牌可+8元換，為何收我正價，八婆收銀說亂咁講假日沒餐，當我們傻，沒你又唔收牌，我第二日假期去買，咪又係比到餐價我。經過這事，已同店長反映，如再見到此收銀，會叫朋友不要幫襯。其實食物幾好，請埋D人，真係好惡劣。

最近你附近返工成日食呢間有質素嘅茶餐廳呀面積細細其實一啲都唔平呀貴過大家樂不過勝在有懷舊風味囉有我最鍾意嘅成日懷舊茄汁牛扒飯呀嗰個茄汁呀 真係童年回憶 仲可以㗎茄汁意粉添呀邊度最出名炸雞髀啦什扒啦同埋糖水我都鍾意食晏晝再嚟食個糖水㗎喇 充滿情懷嘅街坊小店食物質素ok見口撞面都係嗰啲街坊真係街坊嘅食堂呀

因為工作地方係順天，所以成日都有機會食到順天村嘅快餐店，不得不提順天嘅愛心快餐。順天愛心快餐作為一間座落係順天村幾十年嘅快餐店，相當有人情味。每個入黎嘅街坊都同同店入面嘅職員都有講有笑，可能依個係香港依家最缺乏既社區鄰里既友好關係?(牛扒早餐|42)叫左一個牛扒早餐，牛扒足料，份量都非常足，配有香腸煎蛋同焗豆同一杯熱飲，而且方包自帶烘底，如果唔食方包既話可以轉做薯餅，質素唔錯，值得食完再食。食店評分味道⭐⭐⭐環境⭐⭐⭐服務⭐⭐⭐衛生⭐⭐⭐抵食⭐⭐⭐

由愛群食到變愛心。順天得果幾間餐廳，以前唔係食天皇就係食愛群，依間都食左十幾年。茄汁味道咁多年都無變。豬排都係咁上下，不過不失。平時會叫羅宋湯,因為好濃味好好飲。都係街坊生意，佢地又唔介意街坊叫學生餐。有時有d細路玩完，會入去斟水飲😂😂最近好小幫襯，入去見到員工無再著果件好classic既工作恤有種失落感。同埋一入門口個鐘都無左好耐，但總會下意式望一望。屋邨茶餐廳價錢覺得有點貴，不過明既，要交租比領展，條邨又得一間中學，又係老人邨，有人接手仲有得食仲想點？之後有機會仲會幫襯。❤️

由細食到大既一間懷舊快餐店，裝修幾十年不變，由愛群食到變愛心，名字改變但味道不變，廚師都由哥哥變左做叔叔，食到既除左好味仲有人情味。識得食一定係食下午茶炸雞髀同埋炸薯條，啱啱炸完好新鮮，咬落去外脆內軟，雞肉嫩滑，好多汁，大大隻啖啖肉，仲要唔算太油利，唔會炸到出黎乾真真。雖然最近附近新開左間連所快餐店大x活，但食落就知分別起邊度，食左咁附地方既炸脾，呢度都算做得出色，雖然好邪惡但成日忍唔住放假都要落去幫襯下。

今早起身，天氣驟降，早上去另一間中心返工。出外工作後，全身凍冰冰，下午2：30，同事帶我去食午餐。小型街坊式快餐店，餐牌清晰、佈置簡單、普通膠櫈，但別有一番風味。我點咗雞球煎蛋通粉，配熱華田，$31，買飛後聽號碼出去捧餐，第一個感覺，好大碗，賣相幾靚，尤其係隻煎蛋！我出去問水吧攞咗兩小包茄汁，開始品嚐！煎蛋好靚，有蛋黃流出；雞扒已切件，方便進食；通粉軟硬度適中，份量頗多；雞扒煎過，外層稍硬，但肉質嫩滑；湯夠熱亦入味，我一大碗全部清哂，湯都冇剩！熱華田，加一條附送砂糖，味道稍甜！倒咗半杯熱水後，味道總算啱啱好！同事點咗蛋牛治餐，加$3配老火湯，份餐同我一樣$31，佢話呢度啲老火湯最正！半小時嘅飯聚，久違了嘅分享，食完全身暖笠笠，繼續為工作努力衝刺！

呢間快餐店由細食到大，門面外觀都好80年代感覺，裝修硬膠紅白色膠牌為主，硬膠椅卡位，食物香口炸扒為主，基本上早午晚都係咁多人！呢排見佢閉門裝修3日，之後重開，除了名字改了之外，內部格局同人手都不變，店員話轉老細，下切不變！其實都有變，以前牆上餐牌掛滿食物款式，而家只淨低最受歡迎嘅1/3！叫個炸魚薯條懷舊下，交飛坐低等了10分鐘，下午茶時間8成滿，到店員嗌號碼，自助去櫃檯取！炸魚薯條：賣相平實，即叫即炸所以熱辣辣，波紋薯條炸得有點黑，好在唔乾，熱到辣咀，點茄汁好味！魚柳厚身，外脆內軟熱辣辣，無腥味，拌碟有沙律醬，酸酸地好味！熱檸茶：高身膠杯好抵飲，茶底唔澀，茶餐廳水準！好味！店員勤快！服務正常！呢類快餐店已經買少見少！要好好珍惜！