新三得火鍋海鮮酒家 (已結業)

同朋友不嬲食開厚x館方x 記，上星期個朋友話呢間試得過，不妨試吓啦! 象拔蚌刺身好正! 又食咗蝦刺身、貴妃蚌、手切肥牛勁好味，墨魚丸好爽! 最緊要都係係呢d 呀! 係佢地服務好呀! 星期六坐滿客仲係好好招呼，又會出聲提你d 野灼幾耐呀，我個朋友帶埋小朋友佢又會建議你點d 啱佢食o既野，同食開嗰兩間「流水作業」式待客，又要等餐死真係完全唔同，幾個人食又飲又食咁都唔駛一千蚊，夠好啦!

尋晚三個大食女人, 叫左個特平牛腩窝底, 跟住係大碟頸脊肥牛, 游水墨魚, 醬爆魚旦(好似福州魚丸), 新鮮牛肉粒, 斑片, 黑牛柏葉, 桶蠔, 象拔蛘仔, 豬粉腸, 脆炸魚皮, 三枝大啤... 最欣賞佢已經調校好既辣椒豉油, 再加椒絲同蒜蓉, 不另收費. 總之又多又食得快, 好飽好滿足,仲飲埋少少湯底埋尾.. 同事話專登由香港放工轉車去都值得.

2008-01-02一眾七人於晚上九點達達，唔駛等位(我最怕等位啦)。己經加分啦。蕃茄薯仔湯底不過不失；大手切牛($138)都算OK；鮑魚仔($88)一份五隻(五蚊銀咁大仔)X2四丸(一般)海蝦($80)十隻大蜆($45)十幾隻兩碟菜十支啤碟頭較細；有水準地方同服務都中上直得一試

星期五晚約左屋企人係九龍城食飯, 突然又想打邊爐, 行左好多間火鍋, 本來選擇左東榮, 一進內門口個女人好似唔想理你咁, 感覺好唔好, 啊妹即刻話走, 於是諗住去利得, 行行下經過呢度,見出面好多魚江,並且有寫價錢, 門口啊姐都好熱情叫我地入去試, 於是便入內試試, 首先選湯底,啊妹食麻辣,但我地要清湯, 於是點雙拚,不過覺得收得幾貴,因要將兩個湯底價錢加起,即68+28蚊,點了個海鮮盤有6樣野, 象枚蚌, 三文魚, 鮑魚片, 魷魚, 赤貝, 北寄貝, $88幾抵食, (呢度剩係供應鼓油同辣椒),另外叫左象枚蚌仔$38好新鮮, 雪花手切肥牛細$88左右都唔細啦,好淋有肉味,正, 生魚片, 脆肉魚腩兩樣都好爽, 海蝦$28碟, 牛骨髓好滑, 三黃雞例牌, 九菜餃拚牛肉餃好味,連啊媽平時唔係好食餃都食, 泥蜢一碟28蚊但得4條, 再加左碟唐生菜經已好飽, 加埋一渣酸梅湯, 5枝大啤…再加一4個人埋單$680, 都O.K.既,見SERVICE幾好都俾左10蚊貼士..另外洗手間也很乾淨,一定會再來的,

今週既電影唔多合口胃，跟女友放工後就走黎九龍城搵食而放棄慣常既睇戲活動。今日女友十分渴望打邊爐，就順下佢意啦。經過方榮記過門而不入，只因其圓凳實在係坐得好唔自在。見隔鄰既新三得人氣頗盛，就推門而入。首先要說既係作為火鍋店其二樓既冷氣真係唔多夠，同女友食到滿臉大汗。坐低先奉上每位十元既前菜茶芥醬料費，其實個人都幾憎呢類收費，不過每位十蚊都唔算過態亦既來之則安之。湯底選了特價既蘿蔔牛坑脯鍋($28)，估不到既係牛脯份量十足，而且肥瘦適中，好香口美味；蘿蔔亦不用多提，滾到淋一淋係幾甜幾好食。手切普通本地牛($60)比方榮記既差，雖然咬落有肉汁但有渣且肉味久奉，下次都係要美國肥牛好一點。招牌香茜牛肉餃($20)係食唔出任何味道，再來時可以棄之。有驚喜既係大蜆($28)，一碟有十多隻，無沙之餘蜆肥得似蠔仔一樣，十分新鮮。其餘所點既皆屬水準內，可恨既係當日鵝肝鵝粉腸皆無貨，有一點遺憾。埋單$280連一枝嘉士伯同檸檬綠茶，計落都係方榮記抵一點，不過此處有電視睇而又可以慢慢坐，又係另一可取之處。此餐洗費超出原先預算，好彩今星期有幾十場波可以考考眼光，嬴番洗費番黎指日可待。

價錢合理,服務ok(除左收錢果個女仕,成日黑口黑面).手切牛肉鮮甜味美,班片都係六,七十蚊一份,都幾扺食.食滿二佰蚊就又有免費生啤飲喎.我就覺好good喇!(但新世界傳動網既電話未能晌鋪內接收!)

在大除夕打邊爐，三女一男坐在二樓，環境乾淨，坐位不太擠迫，廁所清潔，食物方面，海鮮如墨魚，象拔蚌都好新鮮，不過大蜆有沙，至於湯底，沙嗲湯底太多油，但芫茜湯底就好正，好夠味，可提起其他材料味道，招牌的芫茜牛肉餃，只係山竹牛肉加芫茜用普通水餃皮包，無物特別，粟米餃亦可不試，反而自製丸類就幾好味，蝦丸和墨魚丸彈牙有鮮味，而手切牛肉，我們是要較瘦的，但入口依然嫩滑無渣，好。至於招呼服務方面，因人手關係，反應比較慢，但態度親切，有問有答，懂執生，人客有比較挑剔要求，都可以辨到，是一個好伙計，最重要的價錢，合理但略貴，因牒頭較少，朋友聚會絕對可以選擇，一家大小要先計計數較隱陣。

呢度打邊爐好正架, d 野好食, 服務都幾好, 都叫做招呼周到. 而且每樣食物都好新鮮, 又大碟喎. 最正就係墨魚丸, 勁彈牙, 好爽. 唔會一舊粉. 好有墨魚味. <br />不過呢度係逐碟計, 唔係任食, 所以一d都唔平!!