沙田茶座

营业中

休息中

早幾日嚟過呢間幫襯，見到佢大大個牌寫住「馳名牛雜麵」（有相為證），呢日心思思嚟試下，一係唔試，要試就盡量試勻佢，於是叫咗牛雜麵最貴嘅一款：至尊牛魔王麵配熱奶茶。叫完餐後，店員姐姐問我飲唔飲湯，我話要，佢哋同好多茶記一樣，有中湯同西湯，我揀咗西湯。西湯一般係羅宋湯，少數會有忌廉湯，呢間都同大多數餐廳一樣係羅宋湯，碗湯顏色好吸睛，非常靚，而且唔辣，好好飲，正！奶茶用瓦杯裝，而唔係膠杯裝，咁先至可以真正飲到茶嘅色香味，正！可惜係無啡糖提供，否則會係幾乎滿分之作。碗麵好多料，有牛腩、牛筋、牛肉丸、牛膀、牛腸、牛肺及牛肚，即係話牛雜加腩、筋、丸，就變成牛魔王，除咗牛丸及牛膀得一件外，其他都有好幾件。呢個湯有別於一般牛雜麵，有鹹味，但唔會過鹹，係我過往食過嘅最淡一間，啱我；牛肉丸好食，有質感，只得一粒真係太少啦，不過作為大雜彙其中一員，一粒又顯得合理；牛膀偏硬，燜得未夠腍；牛肺係爽身，我覺得同腍身比較各有各好，當然傳統上係以腍身為最佳；牛肚係毛肚而唔係金錢肚，個人喜歡金錢肚多過毛肚，原因前者比較爽，後者比較腍，但一般食牛雜，都係食到毛肚，甚少食到金錢肚；牛腸燜得剛剛好，唔會太腍，亦唔會太生，食到牛

早前食過呢間嘅蛋撻，覺得好好食，所以呢日嚟到試埋佢哋嘅午餐。由於第一次嚟，所以唔知道要先撳飛，起外面等候，等叫號碼先至可以入去，不過由於我一個人關係，所以好快有位。打開個餐牌，真係好多選擇，除咗套餐客飯、粉麵飯樣樣齊之外，居然仲有牛雜，真係第一次見，最終我揀咗我心頭好之一嘅胡椒豬肚鹹菜排骨湯飯，由於係湯飯關係，所以即使加$3有熱飲，我都無動於衷。湯飯材料好豐富，除咗有上面所講嘅材料外，仲有草菇及甘筍片，所以賣相一啲都唔差。味道方面，係排骨嘅肉偏少，以及鹹菜真係鹹菜而唔係自細食開嘅鹹酸菜，加上係菜葉而唔係菜白，所以質感有啲柴外，其他嘅都做得唔錯，湯嘅味道剛剛好，有胡椒香辣，但唔會過辣，所以我可以將胡椒粒咬碎食，胡椒粒嘅香味慢慢滲透出嚟，好好食。

🔸金牌常餐 - 秘製豬扒意粉 配 黑松露醬炒蛋、餐包 $58滑蛋做得嫩滑🥚，但黑松露醬嘅黑松露味唔重，亦冇咩鹹味，成份炒蛋味偏淡。餐包就幫你夾埋牛油喺入面。豬扒意粉就有驚喜！豬扒分碟另上，炸得夠香口又唔太油膩，外脆內嫩，十分出色！至於意粉，湯底味道唔算濃郁，正常發揮。環境方面，因為係茶記所以都要搭檯，同埋冷氣比較弱，夏天去食會出汗。但食物好食，會再encore!