海王漁港

营业中

休息中

今日下午我們去咗粉嶺綠悠軒商場嘅「海王漁港」飲下午茶！我們叫咗個自選孖寶：雲貴魚腐水晶粉嘅材料有魚腐、木耳、腐竹等等等等⋯⋯份量非常足料，而水晶粉麵質就相當煙韌彈牙，湯底嘅味道亦好香辣惹味！海斑片蒸自家豆腐嘅海斑片嘅肉質超結質彈牙，味道相當鮮甜，而豆腐就極之滑溜，再加埋舖面嘅蒜蓉一齊食，真係超級正呀！係本人嘅必食推介！另外我們再單叫咗XO醬炒蘿蔔糕嘅蘿蔔糕煎得外層好香脆，再加埋啲香辣嘅XO醬一齊炒，令到味道相當惹味！胡麻秋葵係汆咗水之後攞去雪凍，食落完全無咗啲青草味，加埋啲香濃嘅胡麻醬一齊食，真係非常透心涼呀，啱晒而家炎炎夏日嘅天氣食！鮮蝦菠菜餃嘅餃皮好煙煙韌韌，菠菜苗亦好青嫩！豉汁煎釀茄子嘅魚肉相當鮮味彈牙，而且非常厚身，平日喺其他酒樓食嘅祇有一片薄薄嘅魚肉，但呢度嘅魚肉竟然比茄子仲要厚身，真係超抵食呀，而且口感好豐富！

住喺粉嶺嘅朋友同我們講話，今日喺綠悠軒商場有間「海王漁港」新店開張，叫我們一齊去食晚飯！一去到見到有好多花籃擺放喺店外，而店內嘅環境裝修非常舒適寬敞！我們叫咗花膠珍菌千層腐皮燜得相當入味，花膠好軟滑彈牙，而千層腐皮就吸收晒醬汁嘅味道，質感比較厚身，唔係平日食開嘅普通腐皮，所以口感更加豐富！豉蒜涼瓜炒安格斯牛肉炒得好夠鑊氣，師傅炒嘅時間火候控制得啱啱好，涼瓜好甘香爽脆，牛肉嘅肉質亦好鬆軟，而且份量好大碟足料！海膽醬珍寶蝦球嘅底層係用一塊炸得超鬆脆香口嘅米通，而舖面嘅就係沾滿香濃海膽醬嘅珍寶蝦球，質感非常爽脆彈牙！濃湯花膠螺頭煲鷄嘅湯料超足料，所以煲出嚟嘅湯底非常鮮味濃郁！閩南糯米龍蝦蒸飯，以前食開嘅係蟹蒸飯，但呢度係用龍蝦嚟蒸，感覺好有創意，同埋龍蝦係新鮮即叫即劏嘅，所以肉質相當爽甜彈牙，而糯米入面就有紅棗粒、紅蘿蔔粒、冬菇粒同芋頭粒一齊蒸，質感就好煙煙韌韌，而且蒜蓉同龍蝦嘅精華都滲透晒糯米入面，令到味道更加惹味，係本人嘅必食推介！