影片
电话号码
28915569
营业时间
今日营业
10:30 - 02:00
星期一至日
10:30 - 02:00
以上资料只供参考，请与餐厅确认详情
招牌菜
原本今日去跑馬地一間意大利薄餅店午餐，但原來已經搬舖了，咁唯有喺附近搵一間餐廳醫肚，見到呢一間經過咁多次都冇食過嘅粥麵店，就入去試下啦，冇咩期望，只希望係正正經經嘅一間食店，但結果係…一入到去覺得係家庭式既粥粉麵飯舖頭，有一個聲大大嘅年長女仕招呼我哋，我哋叫咗一個牛腩麵同埋一個雙丸米粉套餐，係包一碟油菜，各$45/每個餐。年長嘅女士就叫我哋點炸兩，我哋話唔叫住，佢就好大聲咁講：嚟呢度唔食炸兩就等於冇嚟過！我哋話睇吓有幾多嘢先，佢再講：有幾多嘢啫，咪一碗囉！年長女仕繼續講：我哋呢度幾十年，上過好多雜誌訪問，跟住下刪1000字自吹自擂自己舖頭有幾巴閉。咁都算啦，由得佢自己講，我哋係唔想叫炸兩啫。牛筋腩麵其實味道係可以嘅，但係份量就偏細，油菜係白烚嘅生菜，冇豉油又冇蠔油嘅，基於唔想再同個年長女仕講嘢，冇要求豉油同蠔油。另一碗係魚蛋牛丸米粉，個湯底認真淡，魚蛋有啲腥，係粒牛丸好少少，米粉偏硬，落咗一匙羹辣椒油，連辣椒油都係冇味嘅，睇到個辣椒油樽身係好多塵，冇晒啲油得返啲辣椒渣喺個底，相信放咗好耐亦冇加過新嘅辣椒油落去嗰隻，所以走晒啲味。都算。成餐飯就係不停咁聽到呢位年長女士講嘢極度晦氣，把口冇停過，唔係鬧呢個就鬧嗰個，個世界好似得佢一個啱咁樣，真係成餐飯都覺得好煩，點解要咁樣折磨啲食客？極度非常之騷擾，真係冇可能會再去，請都唔去，去嘅人絕對係被虐待狂，完全係貼錢買難受。返到屋企上網搵吓呢一間餐廳，原來我並唔係孤獨，呢位年長女士應該就係老闆，仲要係好出名態度差，歷史悠久又如何？食物完全冇質素，環境完全令人不安，完全冇服務質素。見到跑馬地都有好多餐廳結業了，各有各原因，如果將來呢一間都結業，絕對不意外。
继续阅读
中學時期在跑馬地渡過。出嚟做嘢亦曾經住上幾年。那些年愛上了蓮園嘅炸兩。西米布甸。粥。真係一間有心做食物的小店。食物出名，老闆娘霞姐更出名🤣可能我自細習慣了老闆娘直率的性格。抱住有麝自然香心態。我想真係嚇怕咗好多人。講真當然我都驚嘅，不過一諗起好好味嘅嘢食，我又會隻腳不期然地去。已經搬離左跑馬地10幾年。一個月總會跑去跑馬地食返一次，咁多年都仍然保持水準，實在難得。眼見呢幾年好多原本好好味嘅店舖，因為遊客太多出咗名，食物水準每每走下坡。已經食唔番以前細個嘅味道。確實可惜。幸好仲可以喺呢度食到。值得！上兩次食過佢嘅椰汁西米露簡直驚為天人！佢嘅椰汁係新鮮嘅椰汁！超級好味。大家不妨一試。今晚我又去買咗外賣啦。我覺得而家好味道嘅食物。真係要支持！佢嘅炸兩我可以講係全香港最好食。
继续阅读
今晚諗住買糖水回家給家人，入到去我同佢講外賣，要芒果西米露，椰汁西米露，芝麻糊加湯圓，跟住佢同我講冇芝麻糊加湯圓，一係芝麻湯圓一係紅豆沙湯圓，我就話等等，我打電話俾細佬話俾佢知冇芝麻糊加湯圓問佢想轉乜嘢。喺我打電話之際，坐喺度嗰個應該係老闆娘，即刻喺度串我，一係食一係唔食冇第三條路選擇啦，我即刻着火，但係應承咗買糖水我就忍咗佢，我真係唔明咁嘅態度都有人去食嘅😡😡返到屋企兩碗西米露，裏面有好多冰塊，我諗應該雪咗好耐，結咗冰，咁樣都可以賣得俾人，喺呢間鋪先可以做到，都唔知食完會唔會肚屙，我唔會再幫襯，唔會有下次😡😡
继续阅读
初三赤口，去完朋友家，想附近清清地食粥，一家人就近行左入蓮園。一入去，中間一大張枱，放左好多雜物同一盤多碗類似焦糖燉奶的甜品，係冇嘢冚住嘅。叫嘢食，老闆娘問幾次要唔要腸粉。後來有人想食炸兩，佢好晦氣話：「過年油炸鬼師傅冇返，叫左你食腸粉啦，冇炸兩呀！」❌艇仔粥，冇味、少料、好水。賣$55碗難食過海皇粥店好多。❌雙丸撈面，係白水烚咗就咁上枱。感覺唔對路，一問，老闆娘又大大聲答：「你唔講要撈咩我地都就係咁上㗎啦，你要咩講啦。」咁你落單又冇問埋我地撈咩醬，餐牌都冇註明。❌雲吞麵，湯冇味，但雲吞味道尚可。小朋友用筷子敲左隻碗兩三下（真係唔係狂敲打鼓嗰種），老闆娘又走嚟話：「你咪敲呀！之前啲小朋友好乖，而家啲小朋友好曳，我會認得你！」😨想試啖阿女的雙丸撈面，一睇，抽面夾住隻瓜子咁大嘅曱甴仔！🪳🤮🪳怕女嚇親，定一定神，快快夾抽面去另一碗度。（最衰係我冇影相！！）立刻揮手叫老闆娘嚟。佢見到🪳，就問：「咁你而家想點呀？要整過定係點？成碗換哂佢呀？」第一次食到曱甴面，第一次見到咁冇禮貌的老闆娘！帶住小朋友我冇同佢嘈交，但呢次經驗值得同大家分享！呢間真心唔應該幫襯啦。
继续阅读
一入到去，我以為去佐人地屋企，成枱都係雜物，然之後一個個小的糕就成盤放係張枱度，冇野蓋住我入去坐低，揀了個set lunch，位60歲既女待應，應該都係士頭婆，就即刻停粗聲粗氣問我：要湯，菜，定漿。我當時坐果張台好近去過電話，佢接電話然之後拉低個口罩大聲，同廚房講要個菜行街。然之後佢坐喺度，拉低個口罩，大聲講，野當時我已經作剛剛開始食野，我有禮貌同佢講：唔好意思呀，你可唔可以戴番個口罩。佢就反問番我：你食野可唔可以唔帶口罩呀？我真係唔想再食落去，我問佢幾錢， 我放低啲錢就即刻走，我只係食左好少。 我出門口嘅時候，佢仲要同我講：你咁驚，點出嚟行啊，你用個網呀，由頭到腳包住你成個人啦。
继续阅读