2+2 Coffee

营业中

休息中

由於在附近工作，差唔多已試哂呢間小店所有意粉，調味較清淡，但好香同健康😆個人最中意係煙肉肉醬意粉😋每次打開都熱辣辣，係老闆新鮮即炒🍝 另外一提，所有咖啡☕️都好香好好味，個人其實唔係好識分咖啡，mocha同hazelnut latte同埋green tea latte🍵係我最常叫，飲得出豆好香🥰 會繼續支持小店！

食左好幾次 總結一下幾次嘅食評同體驗先~佢哋啲咖啡豆好似係自己拼配，偏向nutty啲，見佢整凍啡嘅時候仲會落多半shot，話怕啲冰沖淡左啲啡唔怪得之之前嗌左杯凍啡溶左冰先飲都仲有啡味除左啡仲有意粉牛角包焗薯等嘅野食 仲有set買，一般我都係當lunch甘食，推薦嘅就係下面！(仲有海鮮㗎不過我唔食得)不過等嘅時間有啲耐，如果急嘅話可以wts落定order，一到lunchtime直接落去拎得食啦！

又濕又凍毛毛細雨，咖啡癮起2plus2coffee絕對係不二之選單一咖啡的香氣，一杯咖啡已經感受到佢哋嘅用心。今日試咗期間限定黑糖燕麥奶咖啡😊大滿足唷！唔會好似台式黑糖飲品嗰種只有甜之感覺🥹比起一般咖啡更濃郁、滋味更豐富、更有味道層次感。唯一要挑剔嘅⋯係要等吓下次都係what’s app order 咗先，唔駛等😚

有試過沙律蛋牛角包同埋芝士火腿牛角包🥐，配鮮奶咖啡及抹茶鮮奶。不知道他的牛角包是否即叫即整，總之就是非常鬆脆可口，而且攞上辦公室吃還是熱辣辣的，雖然佢細細件，而且都幾貴，但係為咗美好嘅一日開始，每個禮拜日我都會食佢🤣幫自己打氣。都慶幸整出嚟係好食的。餡料方面，其實都係印象中或者預期中嘅味道，唔係話有咩特別。他的咖啡☕️個人覺得係牛奶味會多少少🤏咖啡唔會酸。而他的抹茶鮮奶，同樣都係牛奶味比較重，可能佢落牛奶的份量會比較多啲，就唔係話10分香。價錢方面，個人覺得其實都算係偏貴。😆

😊路過見特色小店，環境有heart♥️, 被咖啡香味吸引我入去，但我係唔飲咖啡☕的😂見門口的餐牌好多係牛角飽🥐亦都係我至愛，於是入去外賣一試，桂圓紅棗茶☕同最普通的牛角包🥐，水滾茶靚☕，牛角包香脆🥐，老闆話係法國牛角包🥐，😍值得一提包住牛角包🥐的特別設計紙袋，手拎住食唔會跌碎落地👍女店員親切有禮🙎🏻‍♀️，等待期間不斷有熟客前來幫襯😊老闆同店員都能叫出客人名字😍會再去幫襯😊可whatsapp落單，免除等侯時間👍

又要去茘枝角揾公司個客傾嘢， 上次嚟過呢間咖啡小店，覺得個牛角包幾好食， 今次決定試埋佢其他嘢😋由於時間尚早關係，得熱狗同牛角包，既然上次已經食過牛角包🥐今次就決定試下佢哋個熱狗🌭啦😋同牛角包一樣都係即刻整，所以店員姐姐 同我講大約需要8分鐘。 果然隻熱狗真係熱辣辣🔥🔥🔥 同平時食開嘅熱狗有啲唔同， 個包唔似普通本地品牌， 熱狗腸亦唔係廚x腸咁幼👍店員姐姐話大約十一點左右會有意粉供應，可以whatapps預訂。 不過我又唔係喺呢頭返工，唯有下次路過睇吓食唔食到啦😌不得不讚呢間店嘅員工好好禮貌💯 即使我喺早餐時段幫襯， 店員好忙都有講「多謝」，「麻煩等等」……

今日見客要去香工，幾年無嚟，香工C出口果邊原來開咗一堆小店。🍘🍝🍢☕🍛🌭行咗陣見到間cafe，叫咗牛角包餐，餐飲包一杯Americano☕由於食物係即整，所以要等7分鐘，但係非常值得等待！個牛角包拎到上office仲係脆卜卜，個炒旦好香好滑😍Americano入囗好順，同埋好夠熱☕店員都好有禮貌👍👍👍詳細介紹咗餐牌，同埋有咩必食推介。唯一可惜嘅係暫時無得堂食😞 如果唔係可以坐低慢慢嘆。

禽日有人請飲呢間既cappuccino☕️, 咖啡好香～今朝再試佢既碎蛋沙律牛角包🥐+Flat White(soy milk),,牛角包好新鮮香脆，唔會好油膩，yummy yummy😋～而Flat White 就一般，個人覺得禽日既cappuccino 比較好～😉

見到社交平台有人講呢度咖啡好飲，牛角包好食，見到係小店就專登揸車去支持下，買個外賣做午餐。已經避開peak hour，冇乜人至去買，都差唔多三點。位女店員好忙㩒 緊電話，我又唔趕時間咪企响度等佢用完電話先，可能人哋有事呢。點知佢真係繼續玩電話，望下我就算好啦，我就唔該佢落單啦，一句聲都唔出，黑口黑面。我叫咗一個flat white同一個雞蛋沙律牛角包。我係立即上車食。Flat white 其實都幾難難飲，都係espresso + microfoam，應該係higher proportion of coffee to milk。但係呢杯就真係唔好飲，勁多奶，無乜咖啡味，好失望。個牛角包唔係講到咁好食，個牛角包脆但係有啲位好硬，蛋沙律應該自己整仲好食。所以食物同飲品都好失望。想支持小店都要小店有啲誠意呀！

之前路過已經試過佢嘅咖啡, 但當日太飽冇諗過食嘢, 多口問老闆啲牛角包脆唔脆, 佢話脆呀你下次可以試, 我就一路記住呢件事.今次終於有機會!!叫咗碎蛋沙律牛角包 + flat white 個牛角包好！香！脆！牛油味夠之餘唔會好漏碎蛋沙律好香喜出望外

週末假期嚟到長沙灣行街，路過見到哩間細細間既特色小店，主打咖啡、意粉同包點。剛係LUNCH TIME，老闆一個人邊煮邊招呼客人，見佢好落力咁炒緊意粉，我都慢慢睇下週邊環境。見到好得意既ESPRESSO SODA，一於試試。飲品牛角包餐($54) ，門店面積不大，主打外帶，要係到食埋就要立食快食。牛角包偏細，老闆解釋焗一盤既牛角包總有三幾個未能發到最大，所以吞拿魚加量補數。縱然唔大個，但一咬第一啖係意想不到既脆口，一試愛上哩個牛角，包亦有牛油香但唔會漏。而外間少見既ESPRESSO SODA對我嚟講好新鮮，行到熱辣辣係要汽水解熱，啡味同汽水都可以夾得嚟，令人精神加倍

呢間 2+2 cafe 好有愛架，只要你幫襯過一次，老闆娘就會認得你個樣，同埋記得你叫咩名！真係好有外國小鎮cafe feel！雖然唔係日日幫襯，老闆見你熟客仔翻單，佢就會揀個大隻d既牛角包俾你，超正！佢地店面唔太大，都有少少bar table位，唔太趕既都可以係度食埋先走，但打工仔多數都係趕頭趕命，你可以落車前whatsapp佢地order定，去到俾cash都得架，要記住唔好order左又no show，人地2口子小本經營only！早餐配熱辣辣牛角包或者麥包，lunch呢就配意粉或Pizza，咪睇佢個意粉盒四四方方細細盒會唔夠食，對女士們黎講佢份量剛剛好，好食又唔使擔心超標。真係怕唔夠既可以同老闆講佢會free多20g俾你！最正係佢杯coffee，平時跟餐都係得細杯，佢地跟餐杯coffee係大杯架！仲要你想濃味d可以叫佢地加多個shot都係free of charge架！最後，如果你想要d coffee渣除味去蟲，都可以直接同老闆講叫佢留俾你，都係FREE OF CHARGE架！！

最近留意到公司附近有一間咖啡店開左，之前一直無時間去食下，今日終於都有機會了。原來呢間咖啡店叫做【2+2 CAFE】，見到佢帶好幾款既意粉、焗薯、牛角包菜式選擇，不過今日既焗薯賣晒了，唯有下次再有機會試啦。個人喜好既關係，我特別鐘意食焗薯和牛角包，所以我今日就食下佢個「吞拿魚牛角包」，果然無令我失望，佢既吞拿魚好滿滿，蕃茄生菜等配料亦好新鮮爽脆，每咬一口都偕發出「SHOCK SHOCK」既聲音。牛角包包底亦好鬆脆有層次，實在要同大家開心 SHARE 一下。另外，我亦叫左一杯「薑味咖啡」，香濃幼滑，女仔好岩飲，飲完好暖胃，薑味岩岩好，又唔會搶左咖啡既細味。

去開攞代購經過香工，成條街開左唔少新既小店同連鎖飲品店，我唔係台式飲品既粉絲，決定試下呢間2+2 coffee, 如果質素好過stxxbxxks 或者pxcifix 就更加會係bonus 添啦。Letz check it out!menu 已經有少少驚喜了，呢度竟然有flat white flat white 係澳洲新西蘭既popular drink, 香港比較少見，latte 同flat white 都係鮮奶咖啡，只係奶泡多少既分別，但係本人就比較喜歡無咁多奶泡既flat white 都諗住order flat white 架啦，但係見天氣凍凍地，中女見到menu 仲有ginger latte 立即就order 啦！ginger latte 仲少地方有呀 🎉飲落係驚喜喎，咖啡高質過連鎖式，薑味仲好出，一飲就暖笠笠！八卦睇下IG, 原來係用鮮薑磨薑汁整架 下次encore 一定試埋個flat white 先！

荔枝角突然開左好多小店，呢間專門賣咖啡，我梗係要試下，費時成日買星巴克。呢度基本咖啡都齊，我叫左杯flat White大杯，不過佢大同人地中的差不多，等待期間店員好nice咁介紹餐牌,D焗薯餐好像也不錯送到上黎隱約聞到咖啡香,但唔係非常濃,入口亦如是,咖啡可以再濃縮D,因為係flat white,咖啡唔夠濃無苦味就失去意義.加上奶泡都未夠厚,所以行多兩步路就融化曬,有D可惜,但滑度算係唔錯,唯一要加分就係可以揀skimmed milk,好少小店肯咁做呢~~~