春風撞奶舖 (已結業)

呢两个星期每次去元朗做gym经过都见到呢间新开张嘅「春风撞奶」门口人山人海，次次见到个人龙都惊惊，不过今日把心一横决定去排队买黎试吓系咪真系咁好饮。铺面细细，分两条队，一条队买飞，另一条队拎野饮，我问店员边杯最出名，店员态度友善并向我介绍黑糖青蛙撞奶，并同我讲大概要等15分钟。我本身想叫小甜，但店员指甜度已经限死了，冇得调校，令我有少少担心会好甜。其实黑糖青蛙即系黑糖珍珠，由于我本身唔系烟韧控，所以冇乜期待，纯粹出于好奇心睇下佢点解咁多人买来饮。大概15分钟之后我终于攞到我嘅黑糖青蛙撞奶，其实一杯唔系好大杯，价钱都唔便宜，要成＄29/杯。就咁望落去都好似几多黑糖珍珠系底，搅匀再饮落去，咦？又唔系好甜啵！！啲珍珠真系用黑糖煮过入晒味，并唔系好似出面𠮶啲珍珠同埋黑糖浆分开嘅感觉，啲珍珠愈𡁻愈出啲黑糖甜味，令我忍唔住会𡁻多几下，真系几好𡁻几好味，不过鲜奶就真是普普通通冇乜奶味，唔系好够浓，扣分，全靠啲黑糖珍珠令到成杯野加返啲分。杯野神奇之处就系令到我呢个唔系烟韧控嘅人会食晒佢啲佢啲黑糖珍珠，我会系咁用饮筒吸晒佢𠮶啲珍珠上嚟𡁻，直到最后一粒都不剩下为止，重点系我平时饮珍珠奶茶系要叫佢少珍珠㗎😂