肉肉強食 by 鋒膳 (已結業)

细个嘅时候，爸妈成日会带我哋去食铁板餐，仲记得𠮶时食铁板餐系一件超开心嘅事，因为有得锯大大块扒，又有得放纵食薯条。大个咗反而好少再食。呢日阿妹介绍我嚟长沙湾呢间肉肉强食，走怀旧港式西餐厅路线，枱面铺上红白格仔枱布，d童年回忆返晒嚟！铁板餐价钱非常亲民，最抵食嘅当然系$20嘅吉烈宫崎猪柳铁板餐，6pm后供应，每天限20份，我哋点咗一份，上台时完全吓亲，因为份量绝对无将货就价，足足有两大块之多，而且每块都非常厚切！猪肉仲要用上宫崎猪柳，肉质爽弹有嚼劲，炸浆都好薄，淋上蒜蓉汁后，非常惹味！其他铁阪餐一样价钱相宜，$58-138不等，而且不收加一，难怪平日晚市都座无虚席！、牛柳铁板餐($128)采用纽西兰牛肉，肉味虽然唔算浓，但肉质好软腍，毫不嚡口。我特别欣赏餐厅强调所有肉类都不以松肉粉或食粉去腌，食得健康！牛柳同黑椒汁系绝配，上枱时，店员就淋上黑椒汁，铁板滋滋作响，声音好疗愈！美式什扒($78)呢个又系充满童年回忆，细个我最钟意就系食什扒，因为款式最多，感觉最丰富，啱晒贪心嘅我！呢度嘅什扒份量好慷慨，眼见几乎所有客人都食唔晒，好夸张！有鸡翼、猪扒、司华力肠、烟肉、鸡扒等，配上洋葱汁，太好食！