茶狼 (已結業)

本身都钟意饮啲台式茶饮，尤其珍珠鲜奶茶、花果茶，但就真喺好少专登买杯嚟周街饮，上次，晌「天仁茗茶」试咗杯黑糖珍珠鲜奶茶，都喺拎番公司慢慢叹；今次，晌「茶狼」所试嘅黑糖珍珠鲜奶茶，同样拎番公司慢慢叹，尤其依家仲喺疫情反反覆覆嘅情况，晌公司饮就安心啲，再加几件饼当下午茶，松一松。「茶狼」嘅饮品选择都几多元化，但睇落就好似好难分为咩类别，总之花果茶、水果茶、奶盖、珍珠鲜奶茶……好多选择啦。冲绳多良间岛黑糖珍珠鲜奶碳焙乌龙茶 $36小弟就真喺几偏好黑糖嘅味道，所以，拣咗呢一款特别标明黑糖喺嚟自冲绳多良间岛，其实，相信名大于实，沟咗落啲奶茶度，都较难分别出啲黑糖质素高到去边，不过，听落个名就好似好劲咁啰。而碳焙乌龙茶嘅味道都OK，茶味都几香，口感亦不俗，颇顺滑，但喺，啲珍珠就好一般，唔叫得QQ，反而有少少腍腍哋嘅感觉。初尝「茶狼」嘅出品，算喺叫OK啦，不过，啲服务真喺麻麻哋，我帮衬时人客唔多，但个店员不停讲电话，我栋晌佢面前准备落单，佢都好似未有理会。结果，就喺晌佢一边讲电话之下，一边落单，态度麻麻，似喺做多一个客唔多，少一个客亦唔少。