大爺燒鵝 (香港仔大道)

营业中

休息中

【南区】【大爷烧鹅】我作为一个十八区 foodie，有时都觉得自己颇为失德败行，因为好多时都写唔足十八区。但系当我写得匀啲嘅时候，如果想睇某一区食物嘅读者，可能要等成个月先等到一篇，一阵写咗间都几大路嘅餐厅时，想再睇就又要等。理论上，最完美嘅做法好似系梗咗十八区嘅次序，然后顺序推出，咁样就即系十八日后就点都有一篇。不过难度就系我都好难平均咁去晒十八区，都要顾及返现实生活嘅情况，加上餐厅都唔系平均分布喺各区，好难搞嘛。自己当然有千百个理由说服自己，但系泥水佬造门，过到自己过到人，都要去多啲区食吓唔同嘅餐厅嘅。呢晚适逢打风打到呼呼作响，大家都匿晒喺安全地方嘅时候，我就去咗南区揾嘢食，咁啱见到呢间仲开门，就用你啦。咁佢系烧鹅饭店就梗系要叫烧鹅，叫咗个「烧鹅烧腩仔饭」转「鹅髀」加「咸蛋」，送「例汤」，饮「冻柠茶」少甜。两款烧味我觉得都烧得几好，味道好而啲皮又脆，送饭一流，本身唔多想食米饭嘅我都乖乖哋扒晒佢哋。价钱方面，啱啱好齐头 $100，价钱合理。本身话冇鹅髀，争啲搞出人命，被啲阿姐笑死，打过张单啫，唔使杀人挂，哈哈。事后揾资料先知佢都有分店，就算南区都有两间，所以都写返清楚呢间系香港仔大道