雲在線小鍋米線紅薯粉

营业中

休息中

近排听到屯门街坊推荐一间嘅米线店话佢嘅猪颈肉俾云川烧更加好食，虽然佢位置有啲格摄，并唔系屯门市中心𠮶边，但系小编都决定去试吓酸辣（猪颈肉+腩肉）$59麻酸辣（猪颈肉+鸭胸）$59首先试一试佢嘅汤，佢嘅汤同大部份米线一样都系酸辣麻辣个类，味道就系所见即所得，有齐麻酸辣，但硬系觉得差咁啲层次，冇乜其他味道。不过小编留意到好多街坊都会嗌鱼汤，可能会好味啲，下次小编会去试吓。讲返呢度嘅𩠌，全部一律都系加$13，系会贵少少，但佢每个𩠌都好大份。首推一定系猪颈肉，唔单止份量较多，而且煎得非常香口，有唔少嘅窿边位。佢嘅腌料味系咸咸甜甜，有少少似叉烧咁，外表甜甜哋，有少少焦脆，而且唔会好似云川烧咁切得太细条，仍然有一定嘅口感。其他嘅𩠌都唔错，而且份量好多，例如系腩肉，煮得非常之腍，有少少似食糭入面嘅肥猪肉咁，但小编略嫌佢肥咗少少。另外我哋都嗌咗鸭胸，虽然系来货，但份量都好够。小编之前试埋蒜香鸡扒，蒜蓉香味非常充足，而且鸡扒唔会过老过柴，唯独是咸咗少少。整体嚟讲小编觉得呢间嘅米线舖嘅𩠌都非常之唔错，尤其是系猪颈肉，确实比云川烧更加好食。不过佢哋嘅汤底就普通咗啲，个人觉得如果系住喺大西北都可以过嚟试吓。*