Nebraska Member of Louis Steak House (已結業)

【湾仔区】【Nebraska Steakhouse】自从东铁线延伸咗过海段之后，我过嚟金钟湾仔一带食嘢嘅机会大大増加。而我本身都中意食西餐，所以都想食多啲呢边啲西餐。有间喺庄士敦道同李节街交界嘅扒房我想试好耐，难得中午有时间就特登过去试个 lunch 啦。间嘢全名叫「Nebraska Member of Louis Steak House」，应该系啲扒类高手嘅组织团体之类，我唔太清楚内情，只系识行入去食就得喇。点知佢哋午市都几 full，但系咁啱又有客人离座，居然就被我执到个窗口位坐，好彩呀。叫个 Special Luncheon 先，先上咗是日餐汤同蒜蓉包，系我最憎嘅蕃茄汤，面色一沉之下饮啖试吓，叫声罪过，浓香又清新，好饮，而个包都系好味嘅。主食我试 $380 嘅「美国极佳级厚烧牛小排」，每日限定五份架咋。我食嘅生熟度系 medium rare，完全做到外脆内嫩，牛肉味香，系得嘅！厨师 Michael 都走咗出嚟，我就一味喺度讲好食，简直仪态尽失，哈哈。呢度啲扒系佢哋两父子制作，劲！饮埋杯「咖啡」，几好，埋单价 $418，唔贵呀。。。（地址：湾仔庄士敦道14-16号庄士敦大楼地舖）@