洪記麵家 (翠怡商場)

营业中

休息中

【葵青区】【洪记面家】去青衣运动场睇波，港超联今届中游份子实力相近，场面非常好睇。连一向嘅鱼腩部队港会都踢出超水准，甚至击败过劲旅东方。最重要嘅系，港超联系属于香港嘅联赛，我哋香港自己人都唔去支持嘅话，揾边个嚟支持呢？不过由于工作关系，我都冇可能场场出现，有时间就到场支持咁啦。个人好喜欢晋峰嘅西班牙籍教练艾斯达维嘅风格，尽量都会去睇嘅。而晋峰嘅主场就系青衣运动场，亦都促使咗我今次入埋青衣食嘢，之前其实都系咁嘅。今次嚟到翠怡商场，呢啲屋苑商场唔大，不过点都有啲非大集团小店。呢头最出名系外围间太兴，因为有海景。但系我唔系为呢样，就入商场里面食。嚟到呢间面店就先食 $51 嘅「崩砂腩牛杂河粉」，唔差㖞啲腩，几好食。但系啲牛杂就普通啲，而且偏少，每样得一块，牛肚多少少咁解。相比之下，啲崩砂腩就正好多，顺滑又重牛味嘛。想写多少少嘢嘅我，叫多碗 $43 嘅「净五宝」，净食唔配面就食得晒嘅，我当呢样嘢系港式关东煮嘛，仲好食啦。咁佢有墨鱼丸一粒，鱼皮饺、鱼片头、贡丸、鱼蛋各两件，即系九件嘢，加生菜垫底。前两者几好食嘅，其他就相对平庸，整体唔错啦。饮「冻柠茶」走甜用咗 $8 都系合理，成餐用咗 $102