米亭 (已結業)

阿叔最钟意饮汤，之前睇咗朋友介绍呢间位于深水埗嘅饺子小店，深深畀佢嘅花胶鸡汤吸引。心谂既然自己都好一段时间无嚟深水埗啡游，不如就嚟一次饮啡兼饮汤啦！ 呢间饺子店嘅价钱都几亲民，饺子套餐都系由$58起，可拣白菜或韮菜猪肉饺，如果想食好啲，就可以好似阿叔咁加$15叫山珍松露鸡肉饺或者米亭和牛饺，当然建议你加多$15转埋特浓花胶鸡汤啦！ 饺子餐嚟到，当然第一时间咩都唔食，饮啖汤先。网上揾资料，知道佢哋每锅嘅鸡汤都用上16个钟头熬制，之后加入煎过嘅鸡壳再煲多6个钟先至完成，所以颜色呈金黄色，而且味道果然同朋友讲嘅一样，非常浓郁。加埋鸡脚2只同花胶3件，呢$15加得好值！ 山珍松露鸡肉饺，虽然饺子嘅松露味唔算太突出，不过胜在用料丰富，只只饺子都实的的，入边馅料除咗鸡肉外，更有木耳，食晒6只再饮埋成碗汤都几饱架！ 米亭和牛饺，比起山珍松露鸡肉饺，呢款饺嘅味道浓郁好多，而且带点油脂香，不过阿叔就建议食呢款饺嘅汤底可以拣番啲清少少，例如豆乳豚骨汤，咁就唔会食得太腻喇！