喜萬年酒樓

营业中

休息中

有人話要食乳豬，有人話要食清淡，又有人話要食魚，既然係咁，就嗌個廚師推介精選套餐，有齊3樣。不過套餐始終都唔及散叫的好食。喜萬年乳豬件四分一隻乳豬都幾肥，有肉地，雖然個皮未去到脆和化。黑蒜響螺頭燉竹絲雞湯 裏面的材料佔咗一半，有螺頭和肉，湯有微微的藥材味，雖然湯夠熱，但係我唔係好喜歡嗰種味道。松露香芒脆蝦球芒果清甜，唔覺有黑松露味，蝦係彈牙。香茅煎焗龍躉球由於有香茅，令到啲魚有苦的味道，魚肉有啲實。陳皮蒸龍躉頭腩呢個算唔錯啦!不過有少少魚鱗。濃湯花膠絲浸時蔬清淡，菜心有老有嫩。精美甜品流流地，本以為係紅豆沙，點知係椰汁糕，不過有椰汁味，紅豆都頗大粒。合時果盤西瓜甜美，但係哈密瓜就冇乜味。整體嚟講都幾抵食，服務都幾好，幫你換碟，加茶。