Blue Brick Bistro (已結業)

星期五午餐要食好啲，黎左湾仔呢间餐厅食set lunch呢度价钱中等，环境唔错，坐得舒服又唔会太嘈。服务亦几好。声称4个course但其实汤同头盘一齐上，而且系好细份。波菜配芝麻酱正常不过不失，我食过太多更好食的。汤系紫薯汤，有啲奇怪，似南瓜汤但轻微紫薯味，唔系太够味，配埋啲面包糠食会好啲。主菜拣左意大利饭，啲饭好硬，一啲都唔软棉，个汁亦唔太够味可以浓啲，虾好少菇都系普通，整体好一般。甜品系蛋卷，叫左一个原味一个抺茶味。原味系云呢拿，普通蛋糕一个，略嫌甜左啲。抺茶蛋卷反而有惊喜，好浓抺茶味，一食就满口抺茶的香味，啲cream都一样，唔错。讲真，$148有前菜、主菜同甜品仲包野饮其实几抵食，普普通通一个set lunch不过不失，一分钱一分货，咁的价钱呢个质素都算不俗。想揾个好的环境同友人舒舒服服食餐饭，又唔想太贵，呢度会系唔错的选择。