影片
更多
2010-10-27
35 浏览
返完教会走咗过哩深水埗，原因为帮公司落黄金买代用墨（苦差一件），所以，就顺道揾咗住依区嘅表哥表嫂同埋见到我个恶样先乖嘅表姪女食晏，因为表姪女都几钟意食寿司，以往好多时同佢哋一齐嘅话都会去黄金对面嘅金太郎，但见北河街附近开咗档新嘢「大丸」，今次就改改哩依间新嘢试试。我都系石硖尾大，对深水埗区景物都有份感情。大丸晌幢新楼「富汇居」嘅一楼，佢前身系战前旧楼，地铺系「统一大药行」，望落去好有历史，转眼就变咗，唔拆嘅话依家都可能成为古迹呀！上到去，地方比想像中细，不过纯白色人造石枱面，配粉红色皮梳化椅，就确系几抢眼。觉得最好坐会系近窗一排二人位，因为大大只玻璃窗可以望晒成条元州街街景，感觉开扬；另一排近窗嘅四人卡位就比较窄，可能会无咁舒服；仲有一个「骑呢」死角U形五人位，望落有啲夹硬砌出哩。点都好，心水就系一定要拣坐回转寿司位，点解，下文自有分晓。大丸有咩食，简单，一张半A4纸餐牌打晒出哩，49款寿司（每客两件，价钱分别为$8、$12、$16、$20）、31款手卷（每件价钱分别为$8、$12、$16）、14款刺身、14款煎炸煮物、7款沙律小食，无咗拉面乌冬…等饱肚嘢。唔好见佢有成几十款寿司，好多
上到去，地方比想像中细，不过纯白色人造石枱面，配粉红色皮梳化椅，就确系几抢眼。觉得最好坐会系近窗一排二人位，因为大大只玻璃窗可以望晒成条元州街街景，感觉开扬；另一排近窗嘅四人卡位就比较窄，可能会无咁舒服；仲有一个「骑呢」死角U形五人位，望落有啲夹硬砌出哩。点都好，心水就系一定要拣坐回转寿司位，点解，下文自有分晓。
大丸有咩食，简单，一张半A4纸餐牌打晒出哩，49款寿司（每客两件，价钱分别为$8、$12、$16、$20）、31款手卷（每件价钱分别为$8、$12、$16）、14款刺身、14款煎炸煮物、7款沙律小食，无咗拉面乌冬…等饱肚嘢。唔好见佢有成几十款寿司，好多都系大路嘢，唔算有睇头，而且，以上讲过咁多款嘢，随时有部份材料无供应，七除八扣结果你就会觉得无乜嘢食。但系，坐落你又发觉唔系咁，原来佢哋一星期几日飞机时令货返，餐牌唔会写出哩，但晌回转带除时见到有新鲜嘢，加上总厨旭哥，鬼主意甚多，得闲又搞吓创作寿司咁，所以拣坐回转寿司位有著数，第一时间睇到好嘢，选择多好多！
小食、刺身
八爪鱼醋物，一小兜卖$20；而三文鱼刺身，一客四件厚切卖$42，两者都觉得有啲贵。三文鱼肥美鲜甜，确系几正，只系嫌个价有啲高；但八爪鱼黐住一「pat」浆咁，真系唔太值！
寿司
寿司多以海产类为主材料，而且饭团握得小巧精细，我估系属于江户前寿司，即系饭较少而以海产为主！回转带后就见到晒师傅晌度手握寿司，饭粒松软但唔散，分别点咗海胆$20、蟹柳$8、鸡蛋$8、熟虾$8、鲍鱼$8、腐皮$8、枪鱿鱼须$16共7款，因为怕生嘢唔安全，所以熟料嘅寿司系叫俾表嫂同表姪女食，我同表哥就食生料嘅。整体不过不失，就算只卖$8客嘅鲍鱼寿司，都唔太失礼，咬落柔韧有鲍鱼味；而海胆寿司卖$20一客，唔算贵，因为海胆份量几多，而且几鲜，无话有腥有怪味，质感几软滑！
手卷
叫咗5款：加州$12、鸡蛋$8、青瓜$8、鳗鱼$8、铁火$12（即系吞拿鱼），手卷嘅份量相对比较细件，馅料也比较少，不过大部份卖𠮶$8、$12，都唔好预堆满晒馅料啩。手卷本身质素都唔错，因为紫菜脆身，一咬就开，最怕腍晒嘅紫菜，仲要用哩包手卷，好似食柴皮咬都咬唔开；此外，饭粒同样松软，当然，多啲馅食落口感更丰富啦。
寿司卷
餐牌无写有寿司卷卖，全部晌回转带出品，我哋拣咗三款反卷哩试试，包括加州卷（蟹柳鸡青瓜蟹籽反卷）、加州卷黄色蟹籽版（材料一样但用金色蟹籽做反卷）同炸鸡青瓜芝麻反卷。依度有好多唔同色嘅蟹籽，总厨话佢哋一般存有6只色嘅蟹籽，主要做寿司或寿司卷，令卖相变化多咗好睇咗。三款寿司卷中，前两者比较大路，加州卷常见，另一款只系用咗另一只色嘅蟹籽，最得我欢心系炸鸡青瓜芝麻反卷，我唔知佢有无独有名称，只好咁样叫住先，炸鸡唔油腻而惹味，青瓜爽脆又令炸鸡唔觉肥，以芝麻代替蟹籽，多份麻香，师傅仔仲要刻意将反卷切到唔同高矮，造型更立体，唔似传统寿司卷咁死板呆滞！师傅大可考虑下次用埋黑芝麻，突出黑白色感。
创作寿司
本来大家都食到饱饱，但见到有个创作寿司咁栈鬼，又咁啱表姪女就快生日，所以都拣咗依个层层叠迷你生日蛋糕寿司，用黑碟装属最贵嘅寿司$35。一层寿司饭加一层蟹籽，共4层，用4只唔同色嘅蟹籽（橙、黑、黄、绿）隔住，面面再放上吞拿鱼同三文鱼，加多少少大粒鱼籽，卖相真系好抢眼，几特别，当然味道都同食一般寿司无太大惊喜，不过在乎庆祝吓小妹妹生日，仲唱埋生日歌仔，表姪女几开心呀。仲有多款创作寿司晌回转带出哩，食就无食，不过影低几款，都系自己少见嘅！
临尾又同阿经理Wong Sir搭讪咗几句，佢见啱倾啱讲，本应我哋起锚走人，都被佢叫住，原来佢私人醒，请我哋试咗个鱼皮渍物，又系餐牌无，总厨旭哥瘾起嘅杰作，个样有啲似灼鱼皮，不过就大概系用咗日本酱油、味醂去煮。又真系几好食，块鱼皮少少厚身，但咬落好爽，又带少少烟韧，绝对无腥味，几掂嘅冷盘小食，唔知标价会系几钱？仲有，可能都开咗唔太耐，有啲侍应好似生手咗啲。整体哩讲，笑与OK之间啦！
张贴
