豚王 (新城市廣場) (已結業)

细佬喺外国读书𠮶阵，成日话好想食日本拉面，叫我喺香港试匀佢，然后带佢去食㖞！我都好想帮佢，但系香港人钟意嘅日本拉面，通常都系浓厚又重胶质嘅猪骨汤底，自己个胃又唔争气……试咗几间就顶唔顺，但觉得豚王都唔错。呢日一家人去开沙田，就还细佬一个心愿啦！首先介绍豚王。汤底好香猪骨味，胶质未算太重，几啱我口味。翠王，加入新鲜罗勒叶同埋大量芝士粉，似fusion菜，味道几特别，都唔错。黑王好杰好咸，据讲落咗墨鱼汁。喂！要有海鲜嘅鲜味唔需要咸到呕㗎！黑王咸到呕，赤王就辣到呕。辣到根本食唔出碗面有其他味。如果你无辣不欢，可以一试。个人就喜欢一风堂嘅赤丸，微辣得嚟有层次感。结论系，原味最好食。想变吓款？翠王啦！其他就咪搞。为咗款原味，值得嚟一次。