尚座 (已結業)

每个星期日，我都会同屋企人饮茶，见多次经过「尚座」都冇去食过，终于今日就去试吓啦。唔去犹自可，一去就……点心选择唔多，以小菜为主。我哋结果叫咗一个四人片皮鸭餐。等食物嘅时候，见到有个女仕应，戴住一对蓝色嘅胶手套喺大厅度刨皮切青瓜，呢啲切菜嘅工序唔系应该喺厨房入面做嘅咩？🤔唔紧要，当佢表演刀功。佢切切下，跌咗两条青瓜丝落地下㖞，佢即刻拾返起，抌咗喺垃圾桶，但系佢冇换过对手套就继续喺度切青瓜😱系青瓜丝㖞，佢执起嘅时候应该会触碰到个地下，对手套好污糟㗎嘛，佢点解仲可以继续处理食物架！之后，原来切片皮鸭又系佢负责！佢喺切青瓜嘅枱上面切片皮鸭，依然系𠮶对胶手套。佢好纯熟咁片好成只鸭，亦切得好靓。我都戥呢位女仕应辛苦，因为佢又要切菜又切片皮鸭又要斟茶又要收碟，之不过佢都系一直带住𠮶对手套！！！讲真，餐厅食物嘅味道系ok嘅，花胶云吞鸡嘅汤好鲜甜，块花胶都算大块。片皮鸭亦烧得好香脆，保留到肉汁。我哋全家人食完都无唔舒服，但系，餐厅真系要正视下员工对食物嘅处理手法！补充一下，餐厅地方唔大，眼见大堂有8张枱左右，不过成日见有仕应捧住食物出外面，可能楼上仲有一层。