台灣麵 (已結業)

好耐冇食台湾嘢，去完鱼街补充物资，顺便嚟食个晚餐。晚餐选择多，而且价钱合理，特别系我至爱嘅双排双格餐，唔洗成日挣扎到底食牛肉面定肉燥饭好，而且加$4就有台式饮品，性价比高。今次拣咗红烧牛肉面配台式猪脚肉燥饭，虽然份量唔系话好多，但一次过满足两个要求，令人满足！红烧牛肉肉质细嫩，半筋半肉，而且非常入味，汤底香浓，面质弹牙，系我每次必拣。第一次试台式猪手，焖得够软够腍，一客两件，份量算多，可惜肉燥份量略嫌少咗啲，唔系好够捞饭。朋友同我一样拣咗红烧牛肉面，但另一边系配蒜香鸡翼肉燥饭。鸡翼外皮香脆，肉质嫩滑，蒜香味颇浓，几香口。珍珠奶茶奶味香浓，比茶味重少少，微甜，系我钟意嘅味道，加上珍珠超Q弹，唔错！椰香奶露椰味都几浓，加上胚芽增加香味同口感，可惜甜度唔够，甜返少少更好。呢度嘅食物选择多，性价比高，重点系仲有双拼拣，最啱心大心细嘅人。