一龍蝦兩餸王

营业中

休息中

两𩠌饭以前俾人嘅感觉系穷人粮尾恩物，但今时今日嘅两𩠌饭真系唔讲得笑，分分钟要出咗粮先食得起。之前见人介绍过呢间一龙虾两𩠌王，咁啱今日喺隔离街买法式布甸，就顺道嚟帮衬下呢间名贵两𩠌饭。好彩今日嚟到，时间尚早，仲有齐龙虾、鲍鱼、蒸扇贝，听讲一晏咗就会卖晒。另外仲有其他家常菜，卖相都相当吸引。因为今日屋企冇煤气，阿妈话煮唔到𩠌，所以佢就负责准备白饭，我就负责加𩠌。第一次食两𩠌饭系有龙虾伊面，味道完全有中式酒楼嘅级数，半边龙虾够新鲜，肉质非常弹牙，而且算系几好肉，而伊面就用龙虾汁烩过，非常够味。蒜蓉蒸扇贝嘅粉丝超多而且又够入味，扇贝都好新鲜，加埋蒜蓉真系够晒惹味。蒸鲍鱼就带有淡淡的陈皮香，同埋佢呢只鲍鱼都算系几大只，非常弹牙。除咗豪食海鲜，当然都要食吓家常菜。镇江骨味道调得啱啱好，而且排骨都相当嫩滑唔嚡口。梅菜扣肉捞饭就最一流，佢相对地冇咁多肥肉，食起嚟都健康啲。呢间一龙虾两𩠌王真系非常精彩，感觉简直好似去咗中式酒楼一样，下个月出粮一定会再去过。