丼丼屋 (健威坊) (已結業)

平常我都钟意同屋企人来食丼丼屋，钟意佢唔太贵嘅日式料理，系钟意到最近屋企个间分店执左，我地都会搭车去另一间继续食嘅程度。连锁店来讲，每次来食佢都仲系Keep 到个味道同水准，我觉得好难得。今晚我地来到，叫左个咖哩炸猪排饭（单品）。咖哩汁分量够捞白饭，很好。炸猪排唔会太干，块炸皮唔会太厚，冇呃秤。唯独我地叫嘅只系单品，佢唔会有沙津之类嘅蔬菜做伴碟，食起来就有啲寡。另外仲叫左个唐扬鸡丼配温泉玉子（单品）。玉子好似jelly 咁好食，啲鸡都好大粒，有成6-7粒，正。个汁都好食，好开胃。可惜嘅位系，佢menu冇以前咁多款拣，甜品亦都转左，得返一细盒个啲雪糕同泡芙拣，个人觉得不太吸引，所以就冇落单试。最怀念嘅系佢地嘅石头窝牛肉饭，一大盘热辣辣咁送上台，依家只能系回忆中想念佢😭。