一糖 (屏山)

营业中

休息中

一糖位于空旷地方嘅平房小屋之中，个环境令我谂起日本嘅冲绳。一场嚟到就试咗几样嘢，先嚟嘅系紫黄特饮，杯底放咗柚子蜜，然后就倒啲梳打水，再倒埋蝶豆花茶，梳打水即刻被染成紫蓝色。之后再按个人喜好加入适量嘅柠檬汁，睇住佢哋起咗化学作用，慢慢咁分咗紫蓝、紫红同橙黄三层渐变色，我哋都觉得几靓。鲜芒果肠粉，碗入面放满浓稠嘅芒果汁，同埋用咗士多啤梨点缀。下面就放咗几条芒果肠粉，白色嘅肠粉皮估计系用椰浆同蒟蒻粉之类整嘅，咬落有啲烟韧又有啲爽口，中间卷住厚切嘅鲜芒果肉清甜唔酸。睇落平凡，但系味道就唔错。梳乎厘紫薯，上层系用蛋白打发嘅焗梳乎厘，食之前可以淋跟埋嘅朱古力酱，口感软绵绵咁。梳乎厘之下系大量嚟自日本冲绳嘅紫薯肉，有少少紫蓝色咁，食落软身粉嫩，甜味唔重，感觉都几轻盈。由铁路站行多几步就到，位置比想像中方便，就算唔揸车都可以轻松到达。