金船長餐廳 (已結業)

第一次帮衬呢间西餐厅已经大约系十年前， 𠮶阵系朋友介绍， 夜晚去到要排队一段时间， 先有空位。十年前食过乜嘢已经唔记得， 但系呢几排午饭时间都有帮衬佢， 对比起隔离比较新嘅星马泰餐厅， 午饭时间去到，多数都唔使排队已经可以入坐。今次特地为佢写食评， 系因为真心觉得呢间餐厅啲嘢食好好食， 份量够。 佢午市嘅餐牌日日唔同， 基本上 set lunch选择会有沙律，冷盘类，意粉，焗饭， 猪扒同牛扒。 即使你选择沙律， 金船长出品嘅set lunch沙律 一啲都唔马虎, 之前有朋友食过佢嘅麻酱日式乌冬沙律, 无论味道同埋相都系五星级。午市套餐会有餐汤同嘢饮， 如果𠮶日系海鲜忌廉汤， 佢嘅海鲜配料系好多， 有八爪鱼粒蚬肉等等， 今次主菜叫咗炒蕃茄干鲜菌意粉， 味道唔错。 朋友叫咗猪扒配薯菜， 猪扒足足有两大件。其实喺香港， 饮食竞争咁大， 能够屹立不倒多年， 一定有佢嘅原因。 而金船长可以做到而家， 佢食物嘅质素有一定嘅水准。