雙生館 (已結業)

今日刚刚喺长沙湾见完个客，顺便去明爱医院探个朋友，经过一个餐厅门口，几骨子几靓，以为佢系cafe，睇清楚门口个牌，原来佢哋有面，有饺子食。咁就入咗去试下，跟住有个靓女走埋嚟介绍有乜嘢食。佢话今日有个special叫药膳牛腩，可以跟米粉乌冬、关庙面和刀削面。我都唔知咩叫做关庙面，所以我就叫咗药膳牛腩关庙面试。原来关庙面系台湾面，我而家至知。唔试由自可，一试不得了。而家外面啲牛腩做得好硬，好难赵，无以前做得咁腍，咁绵。但系佢煮得好好，而且啲药膳味入晒牛腩里面，但又唔会太浓。靓女叫我先试个汤，佢话呢个系羊肚菌汤，冇落味精。我试后，真系好好饮，全部饮晒。外面好多餐厅都话冇落味精，但系我饮完之后都会好口渴，但佢哋唔会。为咗证明我冇讲大话，我影咗before and after啲相。除咗面和饺子之外，我仲见到隔离食紧三文治和蛋饼，啲三文治唔系外面的茶餐厅三文治，系用欧式面包夹成嘅三文治，好鬼酒店feel，但系因为唔系我食，所以冇影相。仲有人买咗佢啲面包走，佢哋话啲面包系自己做。个靓女同个客倾咗好耐，但我唔明佢哋讲啲乜，但系好似好专业。我下次一定要嚟试下佢哋其他嘢。呢间餐厅真系值得推介。