三多麵食

营业中

休息中

云吞面云吞超大粒，可能未煑时系一层叠一层，云吞出嚟个样系有啲四四方方，唔系圆轱辘形状，感觉真系怪怪。一口咬落去瞒口系弹牙云吞，虾味同肉味都淡，比超咸嘅汤底抢晒味道，试咗几啖云吞汤之后好口渴，蛋面size较为粗大，面质够烟靭，整碗云吞面算系可以，属于粗犷霸道型！猪润云吞粗面猪润有惊喜，厚切爽脆弹牙，灼熟得啱啱好兼唔嚡口，但系粗面就煮得过咗龙，成碗面腍啤啤，食咗两啖就留返低俾店家。鲮鱼球米嘅鱼肉弹牙，鱼球带鱼香同埋果皮味，味道简单但配搭得啱啱好，传统嘅制法非常有水准，好耐冇食过咁好味嘅鲮鱼球，值得去食多几次！云吞墨鱼丸面嘅墨鱼丸似系街市买返嚟𠮶种口感味道，下次可以唔使再试。白灼鹅肠牛柏叶爽脆，一啲都唔韧，口感虽好，但系鹅肠及牛柏叶味道淡淡，都可以一试。冻柠檬茶茶味薄，柠檬味足够，水准一般。下午饭时间都好多人排队等候，而装修属于旧式云吞面档茶餐厅，座位非常狭窄，张枱摆多几杯咖啡或茶都要将就一下。卫生环境算合格，而服务就唔好有咁多嘅要求，算系礼貌勤快型。