Black Coffee

营业中

休息中

冇错，系为佢而嚟 - “三重朱古力窝夫配朱古力雪糕”。其实，位于裕民坊YM2嘅”Black Coffee”，我喺几年前啱啱开𠮶阵已经有嚟食，𠮶阵冇咩人知，原来商场行到最入有间coffee shop，仲要几高质素。首先，我哋叫咗”香煎口水鸡扒窝夫汉堡配什菜沙律”。沙律份量好多，而窝夫本身已经外脆内软，牛油蛋香充足。但如果仍然嫌口味单一，佢嘅口水鸡扒系辣嘅，可以令到成个汉堡味道丰富好多。跟住我哋叫咗”龙虾浓汤意粉配虎虾”。本来期望唔算好高，但佢哋龙虾汤真系够晒味，意粉亦都足够挂汁，食落去真系会觉得系饮紧龙虾汤，而唔系得少少海鲜酱味。当然一定要讲，”三重朱古力窝夫配朱古力雪糕” (点解啲劲嘅甜品嘅名硬系咁长😂？)。好似一座山咁高嘅朱古力窝夫，好多酱好多料，仲有个朱古力雪糕球，系极之邪恶但好食嘅终极甜品。嗌咗两杯冻饮，由于唔想瞓唔着，所以冇嗌咖啡😂，叫咗抹茶鲜奶和黑糖焙茶鲜奶。味道系好足够，抹茶味同焙茶味系两种唔同嘅感觉。个人认为佢个渐变色可以做得再靓啲。“Black Coffee”嘅主食、甜品同饮品都有水准，个人几钟意佢环境静静地，座位间距合理。但咖啡可能就要等下次日头去先可以再试了。