木船 (已結業)

大陆出差回港，顺道同老朋友食个饭。拣左嚟「木船」，太和港铁站行过嚟，都只系过一条马路，几分钟就到，好方便。餐厅门口同内墙都用左全木条做装饰，完全符合「木船」呢个主题，好有特色。泰式柚子沙律睇相就唔觉大份，但实物就真系好夸张，个碗系好深，食来食去都食唔晒架！好多柚子肉同炸椰丝，连红菜头都有，颜色更加靓。忌廉芝士磨菇鸡翼鸡翼拆左骨，再酿满芝士同磨菇，一大啖咁食，方便又滋味。泰式椰汁鸡汤多料好饮，鸡肉够滑，不过冇个火㷫住就争左啲啲。MEGA咖哩虎虾可以拣四只或六只。我地拣左四只，又未算系MEGA级数嘅，不过就好弹牙。咖哩味香浓，配埋薄饼，连啲咖喱汁都唔可以放过。薄饼用透明杯仔装住，靓之余又几保温，唔错。泰式盐焗乌头个肚仔塞满香茅粒，离远都闻都好香。配搭左两款泰式酱汁，一红一绿，绿色主要系芫茜青柠汁，红色系酸辣汁，两款都同个鱼几夹。朋友话食泰菜指定饮品定系椰青㖞，啲椰青水多到满泻。我就要左杯热香茅特饮，好暖胃，啱晒秋凉天气。仲有成支香茅俾我搅搅，够晒浓味，又有少少似姜茶味添。整体味道唔错，份量好足，都几抵食。唯独欠左泰式甜品，有埋甜品就更完美~