Green Orange

今日放工同朋友去咗上环嘅西餐厅 Green Orange 食晚餐，由于系楼上餐厅，所以相对比较宁静，亦都坐得舒服啲。我哋叫咗个二人晚餐，首先有刺身带子沙律，鲜甜嘅带子刺身上面有啲三文鱼子，仲有少少青瓜粒同芥末，清新得嚟又开胃。前菜我哋拣咗极尽邪恶嘅鸡肝酱拼盘，除咗有又滑又香浓嘅鸡肝酱，仲有配咗黑松露嘅芝士同salami，配烘过嘅餐包一流，鸡肝酱上面有一层鸡油，非常香滑而且鸡味浓郁。拼盘仲有酸瓜，食完之后可以帮助去油腻感。餐汤有甜甜地嘅忌廉南瓜汤。主菜我哋拣咗美国顶级牛柳裙边，medium 嘅牛柳烧到啱啱好，外面有焦香味，入面仍然粉嫩。上面铺咗Parsley，食落有淡淡的香草味同黑醋调味。第二度主菜系黑松露意大利饭，黑松露香气扑鼻，意大利饭入面夹杂住杂菇，食落爽口 juicy。甜品我拣咗意式奶冻，热情果酱同生果酸酸甜甜，好配合奶冻。朋友叫咗啤梨苹果金宝，crumble 够脆，同云呢拿雪糕好夹，仲食到啤梨嘅果肉。饮品就拣咗prosecco，够消暑味道又唔会太抢。