多寶樂茶餐廳

营业中

休息中

星期六下昼喺上环收工想去海安食个tea，可惜嚟迟一部四点半收咗工。于是求其揾间嘢食完返归。见到呢间多宝乐细细间几街坊，入去试下，见到餐牌真喺吓一跳，港岛区竟然仲有咁亲民价钱既老茶。原本想食茶餐，但见常餐都咁抵，就食个呢个啦。沙牛香肠面配双蛋方包，餐饮要热奶茶。沙牛无味好麻麻，但呢个价钱竟然用出前一丁，值得加分，虽然我唔觉出前一丁有几巴闭，但须知有啲茶餐厅够胆死要加五蚊先用丁面，呢间算落本喇。香肠应该系厨师肠，算系港人最熟悉既香肠吧。煎蛋系太阳蛋，稍生，唔食生鸡蛋记得出声要熟啲，不过我就钟意。方包够牛油，可惜系冻冰冰，好似啱啱雪柜拎出嚟咁。最后系冻奶茶，算唔错，有茶味，最开心系叫少甜，真喺比少甜我，无当耳边风。值得一提，呢间老茶由下昼二至八有特价炒粉面饭，只收30，仲连饮品，呢啲价真喺十年前既集体回忆。呢啲街坊餐厅真喺买少见少，希望佢可以继续经营，服务街坊。