我愛慢煮 (普慶坊) (已結業)

今晚约咗朋友聚旧，拣咗系上环普庆坊嘅呢间我爱慢煮晚餐，贪佢够隐蔽，可以慢慢倾计。最近开始热返，朋友一坐低就叫咗一杯荔枝接骨木花特饮。杯特饮加了雪碧，味道清香，荔枝味道浓郁亦有几粒荔枝肉。我哋仲叫咗芝士条做餐前小食，新鲜热辣炸起，外面脆入面烟韧，食起上嚟有拉丝效果，仲可以点mayonnaise食。主菜朋友叫咗红酒香草烩羊膝，一放低时整道菜烟气缭绕，睇得出佢啱啱整好。羊肉好好肉地，够嫩又唔骚，加咗香草令味道更出色。酱汁有小小甜味，点嚟食又别有一番风味。我叫咗香烤三文鱼扒，三文鱼皮煎到香口，鱼肉油脂充足，咬落松化。最后，我哋拣咗慢煮红酒梨子配雪糕做甜品。原只嘅梨味道带有好香嘅红酒味，红酒煮完梨之后亦同时变到好甜，饮落有啲似mulled wine。配玄米茶雪糕，清清哋同红酒梨子好同夹。