茶A (已結業)

同朋友做完嘢响粉岭揾嘢食，其中一个带咗我哋嚟到茶A食下午茶，位置响商场入边邻近地铁站都算方便嘅，起码落雨都可以直接地铁站行过嚟，装修都简洁舒服，唔知系咪同隔离餐厅同一个老板，如果冇讲到我以为去咗隔离台式餐厅一样，只系唔同入口，不过整体来讲都系干净舒服嘅感觉。我就叫咗个茶A招牌猪润面常餐，跟埋嫩滑炒蛋同埋牛油多士，另外加咗杯红豆冰。主要系因为好耐冇去过深水埗食猪润面，所以顺便开到试吓。嚟到嘅时候份量系几好嘅，猪润就有啲过熟，汤系有𠮶种猪润汤嘅味道，不过同一时间就咸咗啲，可以食猪润可以食面，但系唔可以饮汤。炒蛋都算滑嘅，多士平平稳稳冇乜特别但系可以。红豆冰觉得真系几够奶几香，红豆系完全一粒粒𠮶种。其中一个朋友叫咗份脆炸薯条配黑松露沙律酱，薯条出嚟够新鲜够香口，黑松露沙律酱都食到黑松露嘅味，不过沙律酱偏少。另外一个朋友叫咗咸牛肉炒蛋多士，咸牛肉炒蛋出到嚟比较厚身，所以食落去口感比较好，多士就冇乜特别，整体来讲主要系个摆设感觉好睇。下次嚟可以试吓第二啲嘢食。