路斯餐廳 (已結業)

今日晏咗食lunch 同事就話呢間餐廳有下午茶 咁就嚟咗呢間餐廳😺餐廳啲座位都幾闊落 坐得都幾舒服 環境就暗咗少少 不過西餐嚟講 夜晚應該幾有氣氛😮由於未食lunch嘅關係 就揀咗兩個重啲份量嘅下午茶餐 雖然比起午餐menu平九蚊 但係份量應該同午餐一樣咁多😂 除咗冇咗個餐湯之外西西里式鮮茄烤豬扒飯 賣相好吸引 放喺面嘅芝士睇得出用咗多過一款芝士 同一般茶餐廳求其放啲芝士粉好唔同🧀 豬扒偏林 有連骨 番茄醬好濃味 雖然有鮮茄塊 但係食落都係人工番茄醬味 個味道唔算太討好 炒飯底就不過不失 成個飯嚟講最出色係佢嘅芝士 如果再揀過食咩 會對芝士白汁焗雞扒飯有期望啲🐥蒜蓉汁雞扒紐倫堡腸飯 普通碟頭飯 雞扒同腸都各有兩件 蒜蓉汁偏鹹 雞扒煎得好香口 食落口仲係熱辣辣 紐倫堡腸就比較失望 本身諗住個外皮會煎得香脆 點知成條都係林嘅 冇乜特別😕 另外個白飯只得微暖 同個雞扒有好大反差不過用下午茶餐嘅價錢食到午餐嘅份量 個人認為性價比都算高