龍城冰室

营业中

休息中

牛頭角龍城冰室 下午飯套餐羅宋湯味道普通帶微酸辣，蔬菜及牛肉味稍淡，有少少似中國嘅酸辣湯。酸菜魚鱸魚肉滑皮韌，酸辣開胃，川椒辣椒加埋一齊食好惹味，做得幾出色，酸菜味淡缺乏酸味，伴碟裝飾夠靚仔，但係一定要食得辣先至好落單。五香牛雜五香味濃鹹味足夠，牛腸口感強烈充滿濃郁油脂味，粉嫩軟腍。金錢牛肚炆得稍腍冇煙韌爽口感覺，牛蒡粉嫩軟綿綿甘香味十足，牛肺缺乏口感，整體五香味道豐富，牛雜汁撈飯相對較味鹹。焗芝士咖喱牛筋腩椰奶椰汁味香濃滑，咖喱香氣撲鼻，帶微微辣，雖然要等長啲時間烹調燒焗，但係上枱熱辣辣，薯仔索咗椰汁咖喱夠軟腍入口溶化口味一流，藉得一試嘅午飯套餐。鹽焗雞飯味道鹹香濃郁，雞肉軟腍腍有雞味冇柴皮，砂礓汁稍為過鹹，白飯軟硬度適中。紅豆冰甜味足夠，紅豆軟綿奶香味濃滑溜，紅豆量足夠，係一杯好出色嘅紅豆冰。餐廳好多顧客幫襯，我哋一行五人都俾咗一張U型大餐枱，進餐時寬敞舒適，裝修一般普通。杯碟碗筷清潔乾淨，店員非常忙碌，但都應對有禮貌。餐牌價錢比一般茶餐廳略高。