宮葉 パフェ (已結業)

友人曾对呢间拉面表示赞扬，今日终于得闲一试宫叶拉面。未食到拉面之前，那个和风木系嘅装潢已经好吸引，而且唔似一般拉面店咁逼，座位都几宽敞，而且楼高两层，即使繁忙嘅午餐时间亦唔会等死人。舍弃平日食开嘅叉烧拉面，初尝宫叶，我点咗和风猪软骨拉面，加杯士多啤梨缤纷菓茶。食物不算等好耐就上枱。猪软骨拉面有猪软骨、溏心蛋、葱、荀及云耳，几丰富。猪软骨柔韧有致，软腍嘅猪肉当中又带点软骨口感；溏心蛋亦见出色，半凝蛋黄加埋浸渍嘅外层蛋白，口感不俗。讲到呢度，点少得评论一下拉面以及汤底呢。一般拉面汤底，尤其是日本过江的（好似X兰拉面、X幻拉面、面屋一X），都非常死咸，但宫叶汤底好light，饮起来不太感heavy，相信系经特别调配成港人口味；而拉面面质软硬适中，不太特别有弹性，惟不太挂汤，食落一般。搭配嘅水果茶，虽然有西瓜、菠萝、荔枝等等，但感觉好分离，茶还茶，水果还水果，未能做到水果茶互相配合，味道非常普通。